स्टफ पनीर पराठा - Stuffed Paneer Paratha

Stuffed Paneer Paratha in English

वेळ: ४० मिनीटे
नग: ६ ते ८ मध्यम पराठे

साहित्य:
स्टफिंग
२ कप किसलेले पनीर
३-४ हिरव्या मिरच्या, एकदम बारीक चिरून किंवा पेस्ट करून
१/४ कप कोथिंबीर, बारीक चिरून
१/२ टिस्पून जिरेपूड, १ टिस्पून धणेपूड, १/२ टिस्पून आमचूर पावडर, १/२ ते १ टिस्पून किसलेले आले
चवीपुरते मिठ
आवरणासाठी
३/४ कप मैदा
१ कप गव्हाचे पिठ
१/४ टिस्पून जिरे, १/४ टिस्पून हळद, १/४ टिस्पून लाल तिखट
१/४ कप दही
गरजेनुसार पाणी
२ टेस्पून तेल
२ टेस्पून कोथिंबीर, बारीक चिरलेली
१/२ टिस्पून मिठ
इतर साहित्य
बटर किंवा तेल पराठे भाजण्यासाठी
पराठे लाटायला थोडे कोरडे पिठ

कृती:
१) किसलेले पनीर एका बोलमध्ये घ्यावे. त्यात मिरची, कोथिंबीर, धणे-जिरेपूड, आमचूर, आलं आणि मिठ घालून हलक्या हाताने मिक्स करावे.
२) बाहेरील कव्हरसाठी मैदा, कणिक, जिरे, हळद, लाल तिखट, दही, कोथिंबीर, तेल आणि मिठ घालून मिक्स करावे. गरजेनुसार पाणी घालून मध्यमसर मळून घ्यावे. १५ मिनीटे झाकून ठेवावे.
३) कणकेचे ६ किंवा ८ समान गोळे करावेत. मिश्रणाचेसुद्धा तितकेच समान भाग करावेत.
४) कणकेचा १ गोळा ३ ते साडेतीन इंचाचा लाटून घ्यावा. त्याच्या मध्यभागी १ भाग मिश्रणाचा ठेवावा. सर्व बाजू एकत्र वरती आणाव्यात आणि गोळा बंद करावा. थोड्या पिठावर लाटून तेलावर किंवा बटरवर दोन्ही बाजूंनी भाजून घ्यावा.
गरमागरम पराठे चटणीबरोबर सर्व्ह करावे.

टीपा:
१) कोथिंबीरीबरोबर आवडत असल्यास पुदीन्याची पाने बारीक चिरून घातली तरी छान स्वाद लागतो.
२) जिरे घालण्याऐवजी ओवा घातला तरी चांगली चव येते.

वरी तांदूळ पुलाव - Samo Rice Pulav

Samo Rice Pulao in English

वेळ: २५ ते ३० मिनीटे
वाढणी: ३ ते ४ जणांसाठी

>साहित्य:
१ कप वरी तांदूळ
२ टिस्पून तूप
१/२ टिस्पून जिरे
२ हिरव्या मिरच्या
१/२ कप भोपळ्याचे मध्यम तुकडे (साल काढून टाकावे)
१/२ कप बटाट्याचे तुकडे (बटाटा सोलून)
२ टेस्पून शेंगदाण्याचा कूट
चवीपुरते मिठ
साधारण ३ कप उकळते पाणी

कृती:
१) जाड बुडाच्या पातेल्यात वरी तांदूळ थोडे भाजून घ्यावे, म्हणजे भात हलका होतो. तांदूळ एका भांड्यात तात्पुरता काढून ठेवावेत.
२) त्याच पातेल्यात तूप गरम करावे त्यात जिरे आणि मिरच्या घालून परतावे. गॅस मध्यम ठेवावा. बटाट्याच्या फोडी घालून एक वाफ काढावी. बटाटा जवळजवळ शिजला कि त्यात वरी तांदूळ घालावेत.
३) मिक्स करून त्यात गरम पाणी घालावे. मिठ घालावे. एक दोन मिनीटांनी भोपळ्याच्या पातळ फोडी आणि दाण्याचा कूट घालावा. मध्यम आचेवर वाफ काढावी.
गरमागरम वरीचा पुलाव दाण्याच्या आमटीबरोबर किंवा फोडणीच्या ताकाबरोबर सर्व्ह करावा.

इंस्टंट रवा इडली - Instant Rava Idli

Rava Idli in English

साधारण १५ ते १८ मध्यम इडल्या
वेळ: साधारण ३५ ते ४० मिनीटे (मिश्रण बनविण्यास १५ मिनीटे + इडली वाफवणे व वाफ जिरणे २० ते २५ मिनीटे)

साहित्य:
१ कप जाड रवा
१ टिस्पून तेल, चिमूटभर मोहोरी, चिमूटभर हिंग, १/२ टिस्पून उडीद डाळ, १/२ ते १ टिस्पून चणाडाळ, ४ ते ५ कढीपत्ता पाने
१/२ टिस्पून किसलेले आले
१/२ कप आंबट दही, घोटलेले
१/२ कप पाणी
चवीपुरते मिठ
१ टिस्पून इनो फ्रुट सॉल्ट (इनो सोडा)

कृती:
१) मध्यम आचेवर, कढईत तेल गरम करून त्यात मोहोरी, हिंग घालावे. आधी चणाडाळ घालून परतावे आणि थोडा रंग बदलला कि उडीद डाळ घालावी. उडीद डाळीचा रंग गुलाबीसर झाला कि कढीपत्ता पाने घालावीत आणि किसलेले आले घालावे. त्यावर १ कप जाड रवा घालून २ ते ३ मिनीटे मध्यम आचेवर भाजावे.
२) भाजलेला रवा एका खोलगट भांड्यात काढून घ्यावा. दुसर्‍या भांड्यात घोटलेले दही आणि पाणी मिक्स करून त्याचे घट्टसर ताक बनवावे. रवा थोडा कोमट झाला कि त्यात हे ताक घालावे (टीप २). चवीपुरते मिठ घालून निट मिक्स करून घ्यावे. मिक्स करून १० मिनीटे तसेच ठेवावे. कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) इडली कूकरमध्ये (महत्त्वाची टीप ४) तळाला साधारण दिड इंच पाण्याची पातळी ठेवावी आणि पाणी गरम करण्यास ठेवावे. इडली पात्राला तेलाचा किंचीत हात लावून घ्यावा (टीप ३). मिश्रणात इनो सोडा घालून एकाच दिशेने मिक्स करावे आणि मिश्रण इडली पात्रात भरावे.
४) पाण्याला उकळी फुटली कि इडली स्टॅंड कूकरमध्ये ठेवून १२ ते १५ मिनीटे इडल्या वाफवाव्यात. ८ ते १० मिनीटे वाफ जिरल्यावर कूकर उघडून इडल्या चमच्याच्या टोकाने व्यवस्थित सोडवून घ्याव्यात.

टीप:
१) वरील पाककृती साधी मसाला इडलीची आहे. जर हवे असल्यास किसलेले गाजर, मटार अशा भाज्याही इडलीत घालू शकतो. वरील फोटोत दाखवल्याप्रमाणे भाज्या दिसायला हव्या असतील तर, इडली साच्यात आधी चिरलेल्या किंवा किसलेल्या भाज्या ठेवून वर इडलीचे पिठ घालावे. तसेच इडली पिठात डायरेक्ट भाज्या मिक्स करू शकतो, पण त्यामुळे इडल्यांचा रंग बदलतो.
२) रवा जर थोडा जास्त भाजला गेला असेल तर पाणी शोषून घेतल्याने मिश्रण घट्ट होते, तेव्हा कदाचित थोडे पाणी जास्त घालावे लागेल. मिश्रणाची कंसिस्टन्सी नेहमीच्या इडली पिठाएवढीच असावी, खुप घट्ट किंवा पातळ नसावी.
३) जर तुमच्या इडली पात्रात कमी इडल्या बनत असतील तर मिश्रण २ भागात विभागून घ्यावे. एक भागात १/२ टिस्पून सोडा घालून इडल्या वाफवून घ्याव्यात आणि नंतर उरलेल्या मिश्रणात सोडा घालून इडल्या बनवाव्यात. अशाप्रकारे २ बॅचेस कराव्यात. सर्व मिश्रणात एकदम सोडा घालू नये.
४) जर साधा कूकर वापरणार असाल तर कूकरच्या झाकणाची शिट्टी काढून ठेवावी.

पनीर बिर्याणी - Paneer Biryani

Paneer Biryani In English

वाढणी : ५ ते ६ जणांसाठी
वेळ: साधारण १ ते दिड तास

साहित्य:
२ कप बासमती तांदूळ
३-४ वेलची, ३-४ तमालपत्र, ३-४ लवंगा, १ लहान दालचिनीची काडी
चवीपुरते मिठ
पनीर मॅरीनेशन
२५० ग्राम पनीर, १/२ कप दही, १ टिस्पून आलेलसूण पेस्ट, १/४ टिस्पून मिठ
ग्रेव्ही
१ कप कांदा, उभा पातळ चिरून
५ टोमॅटो, २ टिस्पून आलेलसूण पेस्ट, २ टिस्पून तूप
खडा गरम मसाला - २ वेलची, ३-४ लवंगा, ३-४ मिरीदाणे, २-३ तमालपत्र
१ टिस्पून धणेपूड, १ टिस्पून जिरेपूड, १ टिस्पून गरम मसाला, १/२ टिस्पून लाल तिखट
१ कप मिल्क पावडर (किंवा १/२ कप क्रिम) (टीप ५)
चवीपुरते मिठ
साधारण पाऊण ते एक कप भाज्यांचे तुकडे :- मटार + गाजर लहान तुकडे + फरसबी तुकडे
इतर साहित्य
४ टेस्पून तूप + अजून तूप ऐच्छिक, १ कप कांद्याचे पातळ उभे काप, ८ ते १० काजूबी, ८ ते १० बेदाणे, १/४ कप पुदीना बारीक चिरून, १/४ कप कोथिंबीर बारीक चिरून, २ टिस्पून दूध + ३ ते ४ केशराच्या काड्या (टीप ६)

कृती:
पनीर
दही फेटून घ्यावे. त्यात आलेलसूण पेस्ट आणि मिठ घालून मिक्स करावे. पनीरचे तुकडे या मिश्रणात १/२ तास घोळवून ठेवावे.
भात
१) तांदूळ स्वच्छ धुवून १/२ तास निथळत ठेवावेत. पातेल्यात ६ कप पाणी गरम करण्यास ठेवावे. त्यात वेलची, लवंगा, दालचिनी, तमालपत्र आणि मिठ घालून पाण्याला उकळी येऊ द्यावी. पाणी उकळले कि त्यात धुतलेले तांदूळ घालावे. भात साधारण ६० ते ७० % शिजला कि चाळणीमध्ये ओतावा आणि अधिकचे पाणी काढून टाकावे. तयार भात परातीत मोकळा करून गार होण्यास ठेवावा.
ग्रेव्ही
१) पाणी उकळवावे. त्यात टोमॅटो घालून २ मिनीटांनी गार पाण्यात सोडावे. सालं सुटली कि काढून टाकावी. आतील गराच्या मध्यम फोडी कराव्यात.
२) कढईत २ टिस्पून तूप गरम करून त्यात खडा गरम मसाला काही सेकंद परतावा. आलेलसूण पेस्ट परतावी. कांदा घालून तो गुलाबी रंग येईस्तोवर परतावा. नंतर चिरलेल्या टोमॅटोच्या फोडी घालून त्या नरम होईस्तोवर परतावे. लाल तिखट घालावे.
३) हे मिश्रण थोडे गार होवू द्यावे. मिक्सरमध्ये पाणी न घालता प्युरी करावी.
४) कढईत साधारण २ टेस्पून तूप गरम करावे. यामध्ये काजूबी आणि बेदाणे परतून बाजूला काढून ठेवावे. याच तुपात हि प्युरी परत कढईत घ्यावी. मध्यम आचेवर गरम करण्यास ठेवावी. त्यात धणेजिरेपूड, गरम मसाला घालावा. मिल्क पावडर घालावी. भाज्या घालाव्यात. निट ढवळून हे मिश्रण घट्टसर करावे. चवीपुरते मिठ घालावे. हि ग्रेव्ही एकदम पातळ किंवा एकदम घट्टही नसावी (टीप १). ग्रेव्ही दाटसर होत आली कि पनीरचे मॅरीनेट केलेले तुकडे घालून थोडा वेळ उकळी काढावी.
तळलेला कांदा
तुपात किंवा तेलात कांद्याचे पातळ काप (१ कप) खरपूस तळून काढावेत. हा तळलेला कांदा सजावटीसाठी वापरावा.
बिर्याणी (टीप २, ३, ४)
एकदा भात आणि ग्रेव्ही तयार झाली कि भाताचे ४ आणि ग्रेव्हीचे ३ असे समसमान भाग करून घ्यावे. एका खोलगट नॉनस्टिक पॅनमध्ये पहिले तूप सोडावे आणि पसरवून घ्यावे. प्रथम भाताचा एक भाग घेऊन समान पसरावा. त्यावर ग्रेव्हीचा १ भाग समान पसरवून घ्यावा. थोडा चिरलेला पुदीना आणि कोथिंबीर घालावी. ३-४ काजू, बेदाणे घालावे. अशाप्रकारे सर्व थर पूर्ण करावे. भाताचा शेवटचा थर दिला कि त्यावर तळलेला कांदा, उरलेले काजू बेदाणे आणि दूधात कालवलेले केशर असे पसरावे. वरती घट्ट झाकण ठेवावे, वाफ बाहेर जाता कामा नये. एकदम मंद आचेवर १५ ते २० मिनीटे वाफ काढावी. गरम गरम बिर्याणी रायत्याबरोबर सर्व्ह करावी.

टीप:
१) ग्रेव्ही पातळ नसावी. पातळ ग्रेव्हीमुळे बिर्याणी बनवताना भाताची शिते मोडतात आणि भात मोकळा न होता ओलसट आणि गच्च होतो. बिर्याणीचे थर करताना पसरता येईल इतपत दाट ठेवावी.
२) जर ओव्हनमध्ये बिर्याणीला वाफ काढायची असेल ओव्हन २५० डीग्री F वर प्रिहीट करावा. नंतर बेकिंग पॅनमध्ये वरीलप्रमाणेच थर करावे. वरती ओव्हनसेफ झाकण ठेवावे किंवा अल्युमिनीयम फॉईलने घट्ट सिल करावे आणि १५-२० मिनीटे वाफ काढावी.
३) जर नॉनस्टिक पॅन नसेल तर जाड बुडाच्या पातेल्यात तूप घालून वरीलप्रमाणेच थर करावे. आणि डायरेक्ट गॅसवर न ठेवता खाली एक तवा ठेवावा त्यावर भांडे ठेवावे म्हणजे भात करपणार नाही.
४) प्रत्येक थरामध्ये पातळ केलेले तूप गरजेनुसार घालावे. यामुळे बिर्याणीला खुपच छान चव येते.
५) शक्यतो मिल्क पावडर वापरावी म्हणजे ग्रेव्हीला दाटपणा लगेच येतो. तसेच क्रिम वापरणार असाल तर क्रिम घातल्यावर ते ग्रेव्हीमध्ये निट मिक्स होईस्तोवर ढवळा म्हणजे ते ग्रेव्हीत फुटणार नाही.
६) जर केशर नसेल तर चिमूटभर खायचा केशरी रंग २ टिस्पून दूधात घालून तो वापरावा.

सोया व्हिट नानकटाई - Soya Wheat Nankatai

Nankatai in English

वेळ: ३० ते ४० मिनीटे
नग: २० ते २२ मध्यम नानकटाई

साहित्य:
८ टेस्पून अनसॉल्टेड बटर (१/२ कप)
६ टेस्पून पिठी साखर
१/२ कप गव्हाचे पिठ
१/२ कप सोयाबिन पिठ
१/४ टिस्पून बेकिंग पावडर
१/४ टिस्पून वेलची पावडर
२ टेस्पून पिस्त्याचे काप

कृती:
१) नानकटाई बनवण्यापूर्वी बटर २ तास फ्रिजबाहेर काढून ठेवावे म्हणजे एकदम मऊसर होईल. एका मध्यम आकाराच्या खोलगट ताटलीत बटर आणि साखर घ्यावी. आणि मिश्रण हलके होईस्तोवर जोरजोरात फेसावे.
२) ३५० डीग्री F (१७५ डीग्री सेल्सियस) वर ओव्हन प्रिहीट करावे.
३) बेकिंग ट्रे ला तूपाचा किंवा बटरचा हात लावून तयार ठेवावा. वरील प्रमाणासाठी साधारण २ ट्रे लागतील. एकच ट्रे असल्यास दोन विभागात नानकटाई बनवावी.
४) सोयाबिन पिठ, गव्हाचे पिठ, वेलची पावडर आणि बेकिंग पावडर एकत्र चाळून घ्यावी. चाळणीत जर पिठाचे गोळे अडकले असतील तर ते फोडून घ्यावेत. चाळलेले पिठ, बटर-साखरेच्या मिश्रणात घालावे आणि हाताने मळावे. व्यवस्थित गोळा तयार करावा. (कदाचित एखादा चमचा पिठ वाढवावे लागेल)
५) तयार गोळ्याचे साधारण २० ते २२ समान भाग करावे (१ इंच). प्रत्येक गोळा एकमेकापासून २ इंचाच्या अंतरावर ठेवावा. एका ट्रेमध्ये साधारण १२ ते १४ गोळे बसतील. प्रत्येक गोळ्यावर पेढ्याला लावतो तसे पिस्त्याचे काप लावून चेपावे.
६) ओव्हनच्या मधल्या रॅकमध्ये ट्रे ठेवावा व साधारण १२ ते १४ मिनीटे बेक करावे. बेक केल्यावर ट्रे बाहेर काढावा आणि गार होवू द्यावा. १५ मिनीटांनी खुसखूशीत अशा नानकटाई खाण्यासाठी तयार होतील.

टीपा:
१) मिठ नसलेले बटर वापरावे. बटर नसल्यास मऊसूत घरगूती लोणी वापरले तरी चालेल.
२) नानकटाईच्या मिश्रणात बदाम, काजू, पिस्त्याचे पातळ काप मिक्स केले तरीही छान चव येते.
३) नानकटाईसाठी मळलेला गोळा एकदम तुपकट नसावा. जर बटर जास्त वाटत असेल तर चमचाभर पिठ घालावे. कारण खुप तूपकट गोळा बेक केला तर नानकटाई एकदम बसक्या होतात. कणकेला मळतो इतपत गोळा घट्ट असला पाहिजे.

पनीर फिंगर पकोडा - Paneer Finger Pakoda

Paneer Pakoda in English

वेळ: १५ ते २० मिनीटे
नग: १० ते १२ पिसेस

साहित्य:
२०० ग्राम पनीर, बोटाच्या आकाराचे उभे काप
१ टेस्पून कॉर्न फ्लोअर
१ टेस्पून मैदा
चवीपुरते मिठ
१ टिस्पून लाल तिखट
::::मॅरीनेशनसाठी::::
२ टिस्पून चिली सॉस
२ टिस्पून सोयासॉस
तळण्यासाठी तेल

लहान मुलांसाठी बनवताना लाल तिखट अजिबात घालू नये तसेच मॅरीनेशनमध्ये चिली सॉस अगदी कमी घालावा किंवा तो न घालता टोमॅटो केचप घालावा.

कृती:
१) चिली सॉस आणि सोयासॉस एका मध्यम बाऊलमध्ये मिक्स करावे. पनीरचे तुकडे या मिश्रणात ५ मिनीटे मॅरीनेट करून ठेवावे.
२) दुसर्‍या एका भांड्यात कॉर्न फ्लोअर, मैदा, मीठ आणि लाल तिखट मिक्स करावे. पनीरचे मॅरीनेट केलेले तुकडे कॉर्न फ्लोअर-मैद्याच्या मिश्रणात घोळवून घ्यावे. आणि तेल गरम करून त्यात सोनेरी रंगावर तळून घ्यावे.
चिली सॉसबरोबर गरमागरम सर्व्ह करावेत.

Labels:
Paneer Pakoda, Paneer Appetizer

कच्च्या केळ्याचे कटलेट - Plantain Cutlets

Plantain Cutlets in English

वेळ: पूर्वतयारी- २० मिनीटे (साबुदाणा भिजवणे सोडून)। पाकृसाठी वेळ: २० मिनीटे
नग: साधारण १२ ते १४ मध्यम कटलेट


साहित्य:
२ कच्ची केळी
१ मध्यम बटाटा, उकडलेला
१/४ कप साबुदाणा
२ टेस्पून उपासाची भाजणी
३ टेस्पून शेंगदाण्याचा कूट
३ हिरव्या मिरच्या + १/२ टिस्पून जिरे + १/४ कप कोथिंबीर यांची पेस्ट
१ टेस्पून लिंबाचा रस
चवीपुरते मिठ
तूप किंवा शेंगदाणा तेल, तळण्यासाठी

कृती:
१) साबुदाणा धुवून त्यातील पाणी काढून टाकावे. झाकण ठेवून ४ तास झाकून ठेवावा.
२) साबुदाणा निट भिजला कि केळे सोलून किसून घ्यावे. नंतर साबुदाणा, किसलेले केळे, उकडून कुस्करलेला बटाटा, उपासाची भाजणी, शेंगदाणा कूट, मिरचीपेस्ट, लिंबू रस, आणि मिठ एकत्र करावे. निट मळून गोळा तयार करावा. हा गोळा समान विभागून मध्यम आकाराचे कटलेट बनवावे. आवडीप्रमाणे आकार द्यावा.
३) तेल किंवा तूप गरम करावे. तयार कटलेट मध्यम आचेवर तळून घ्यावे.
गोड लिंबाच्या लोणच्याबरोबर किंवा हिरव्या चटणीबरोबर सर्व्ह करावे.

तोंडली डाळ मेथ्या - Tondli Ras bhaji

Tondli Dal Methya in English

वेळ: पूर्वतयारी-१० मिनीटे। पाकृसाठी-१५ मिनीटे
वाढणी: २ ते ३ जणांसाठी

साहित्य:
१/२ पौंड तोंडली (जवळपास पाव किलो)
१/४ कप तूर डाळ
१/२ टिस्पून मेथी दाणे
३ ते ४ लसणीच्या मोठ्या पाकळ्या, बारीक चिरून
फोडणीसाठी: १ टिस्पून तेल, २ चिमटी मोहोरी, १/८ टिस्पून हळद, १/२ टिस्पून लाल तिखट
१/२ टिस्पून गोडा मसाला
१ टिस्पून गूळ
१/२ टिस्पून चिंचेचा घट्ट कोळ किंवा २ कोकमाचे तुकडे
चवीनुसार मिठ
सजावटीसाठी चिरलेली कोथिंबीर

कृती:
१) तोंडली उभी चिरून मिठाच्या पाण्यात घालावी.
२) तूरडाळ धुवून १० मिनीटे पाण्यात भिजवून ठेवावी.
३) लहान कूकरमध्ये तेल गरम करावे. त्यात लसूण आणि मेथी दाणे फोडणीस घालावे. लसूण थोडी ब्राऊन होवू द्यावी. नंतर मोहोरी, हळद आणि लाल तिखट घालून फोडणी करावी. तोंडल्यातील पाणी निथळून फोडणीस घालावी. एकदा परतून तूरडाळ घालावी व मिक्स करावे.
४) यामध्ये गूळ, गोडा मसाला, मिठ, आणि कोकम घालावे. थोडे पाणीसुद्धा घालावे (साधारण १/२ कप). मिक्स करून कूकरचे झाकण बंद करावे.
५) ३ शिट्ट्या करून गॅस बंद करावा. वाफ जिरू द्यावी. कूकर उघडून रश्श्याची चव पाहावी आणि तिखट-मिठ-मसाला लागेल तसे अडजस्ट करावे.
कोथिंबीरीने सजवून गरमच पोळीबरोबर सर्व्ह करावे.

टीप:
१) पदार्थ शिजायला काही कूकरला जास्त शिट्ट्या लागतात तर काहींना कमी. ३ शिट्ट्यांमध्ये तोंडली शिजतीलच. आपल्याला डाळ शिजलेली हवी पण ती आख्खी राहिली पाहिजे, तीचे वरण होता कामा नये. म्हणून आपापल्या कूकरप्रमाणे किती शिट्ट्या कराव्या ते ठरवावे.

पालक कोबी वडी - Kobi Palak Vadi

Palak Kobi Vadi in English

नग: १५ मध्यम चौकोन
वेळ: ३० मिनीटे

तळलेल्या वड्यावाफवलेल्या वड्या

साहित्य:
१ कप बारीक चिरलेली कोबी
२ कप बारीक चिरलेली पालकाची पाने
१ कप बेसन
१ टिस्पून हिरव्या मिरचीची पेस्ट
१ टिस्पून लसूण पेस्ट
१/४ कप बारीक चिरलेली कोथिंबीर
चिमूटभर हळद
चिमूटभर हिंग
चवीपुरते मिठ

कृती:
१) प्रथम कोबी, पालक, मिरची पेस्ट, लसूण पेस्ट, कोथिंबीर, हिंग, हळद, आणि मिठ एकत्र मिक्स करून घ्यावे.
२) त्यावर २ ते ३ चमचे पाणी शिंपडावे. नंतर बेसन घालून मिक्स करावे. चिकटसर मिश्रण तयार करावे.
३) ढोकळा करायचा साचा असेल तर त्याला तेलाचा किंचीत हात लावावा. त्यात १ ते दिड सेमीचा समान थर पसरवावा. खुप जाड थर करू नये.
४) १५ मिनीटे वाफवून घ्यावे. २ इंच आकाराचे चौकोन पाडावे किंवा आवडेल त्या शेपमध्ये कापावे.
गरमा गरम कोबी पालक वडी चटणी किंवा टोमॅटो केचप बरोबर सर्व्ह करावी. या वड्या तेलविरहीत अल्पोपहार (Oil free Snack) म्हणून उत्तम उपाय आहेत.(चिकटू नये म्हणून लावलेले तेल सोडले तर)
तरीही, या वड्या डीप फ्राय केल्या किंवा शालो फ्राय केल्या तर अजून चविष्ट आणि खमंग लागतात.

टीपा:
१) जर तुमच्या कडे ढोकळा पात्र नसेल तर प्रेशर कूकरही वापरू शकता. मोठा प्रेशरकूकर घेऊन त्यात तळाला पाणी घालावे. वरण-भातासाठी जो डबा वापरतो त्या डब्याला आतून तेलाचा हात लावावा. पातळसर थर करून कूकरमध्ये ठेवावा. शिट्टी काढून १५ मिनीटे वाफवावे. यामध्ये २ ते ३ विभागात वड्या वाफवाव्या लागतील.
२) जर वड्यांच्या आकाराविषयी Concern नसाला तर इडली पात्रातही मिश्रण थापून वाफवू शकतो.

मायक्रोवेव्ह सुरळी वडी - Microwave Surali Vadi

Surali Vadi in English

साधारण १२ ते १५ वड्या
वेळ: पूर्वतयारी:- १५ ते २० मिनीटे । मायक्रोवेव्ह:- ५ ते ७ मिनीटे

साहित्य:
१ कप बेसन
१ कप आंबट ताक (जरा घट्ट)
दिड ते पावणेदोन कप पाणी
पाउण ते एक टिस्पून मिरचीचा ठेचा
१/२ टिस्पून हळद
१/२ टिस्पून हिंग
फोडणीसाठी : २ टेस्पून तेल, १/४ टिस्पून मोहोरी, २ ते ३ चिमटी हिंग
खवलेला ताजा नारळ, गरजेनुसार
वरून पेरायला थोडे लाल तिखट
बारीक चिरलेली कोथिंबीर
मीठ
मिश्रण पसरवण्यासाठी कालथा
जाड प्लास्टिकचा लांब कागद

कृती:
१) बेसन, ताक, पाणी एकत्र करावे. बेसनाच्या गुठळ्या न होता मिश्रण भिजवावे. त्यात मिरचीचा ठेचा, हळद आणि हिंग घालावे. चवीपुरते मीठ घालावे. सर्व मिश्रण एकदम स्मूद करून घ्यावे.
२) बेसनाचे हे मिश्रण शिजवण्यापुर्वी प्लास्टिकचा कागद ओट्यावर किंवा टेबलावर पसरवून ठेवावा.
३) मायक्रोवेवसेफ भांड्यात सर्व मिश्रण घालावे. हाय पॉवरवर ५० सेकंद मिश्रण शिजवावे. भांडे बाहेर काढून व्यवस्थित ढवळावे. किंचीत गुठळ्या होण्याची शक्यता असते तेव्हा एगबिटरने मिश्रण निट एकजीव करून घ्यावे. मिश्रण शिजेस्तोवर ३०-४० सेकंद मायक्रोवेव करत राहावे. साधारण २ ते ३ वेळा मिश्रण मायक्रोवेव करावे लागते. मिश्रण खुप दाट नाही आणि खुप पातळ नाही असे झाले कि मिश्रण शिजले असे समजावे.
४) मिश्रण थंड होवू देवू नये. लगेच कालथ्याने मिश्रणाचा पातळ थर प्लास्टिक कागदावर पसरावा. थोडे थंड होवू द्यावे.
५) कढल्यात तेल गरम करावे त्यात मोहोरी, हिंग घालून फोडणी करावी. आणि मिश्रणाच्या पातळ थरावर चमच्याने फोडणी पसरावी. म्हणजे फोडणी नीट पसरली जाते.
६) त्यावर खवलेला नारळ आणि बारीक चिरलेली कोथिंबीर पेरावी. थोडे लाल तिखट पेरावे. नंतर सुरीने ५ इंच पट्ट्या कापाव्यात. त्याची सुरळी (गुंडाळी)करावी आणि मग त्या सुरळीचे ३-४ भाग करावेत.
७) सर्व्ह करताना सुरळीच्या वड्यांवर थोडी कोथिंबीर आणि खवलेला नारळ घालावा.

सुरळीच्या वड्या - शेगडी (गॅस) वापरून

टीप:
१) मिश्रणाचा पातळ थर करण्यासाठी स्टीलची ताटेसुद्धा वापरू शकतो पण त्यामुळे खुप ताटे वापरली जातात.
२) जर फोडणी फक्त वड्यांवर आवडत असेल तर आपल्या आवडीनुसार सुरळ्या केल्यानंतर त्यावर फोडणी घालावी.
३) सुरळीच्या वड्या करताना नारळ आणि कोथिंबीर आपण आधीच पेरले आहे त्यामुळे चव छान येते. पण सुरळी करताना थोडा त्रास होवू शकतो. अशावेळी मिश्रणाचा पातळ थर केल्यावर त्यावर फक्त फोडणीच घालावी. सुरळी करून मग वरून कोथिंबीर आणि नारळ पेरावे.

Labels:
Surali Vadi, Khandvi, Gujrati Snack

पाकातल्या पुर्‍या - Pakatlya Purya

Pakatlya Purya in English

वेळ: २५ ते ३० मिनीटे
नग: २५ ते ३० मध्यम पुर्‍या

साहित्य:
१ कप मैदा
१/२ कप बारीक रवा
१ टेस्पून तेल, मोहनासाठी
चिमूटभर मिठ
दही (टीप)
पाक करण्यासाठी:- दिड कप साखर आणि १/२ ते पाऊण कप पाणी
१/२ टिस्पून वेलची पावडर
४ केशराच्या काड्या
तळण्यासाठी तूप (टीप)

कृती:
१) मैदा आणि बारीक रवा एकत्र करून १ टेस्पून गरम तेलाचे मोहन घालावे. चिमूटभर मिठ घालावे. दही घालून घट्ट मळून घ्यावे. १ तास तसेच झाकून ठेवावे.
२) साखर आणि पाणी एकत्र करून २ तारी पाक करावा. केशर थोडे गरम करून किंचीत साखरेबरोबर कुटून पाकात घालावे. वेलची पावडर घालून मिक्स करावे.
३) जेवढी मोठी पुरी हवी असेल त्यायोग्य पुरीसाठी समान आकाराच्या लाट्या बनवाव्यात.
४) तूप गरम करून पुर्‍या तळून घ्याव्यात. पुर्‍या टिश्यु पेपरवर काढाव्यात. २-४ मिनीटांनी पाकात पुर्‍या टाकाव्यात. काही मिनीटे मुरू द्याव्यात. नंतर ताटात पाघळवत ठेवाव्यात.
सजावटीसाठी भरडसर वाटलेला पिस्ता पेरावा. या पुर्‍या पक्वान्नं म्हणून जेवणात वाढता येतात.

टीप:
१) दही वापरताना आंबट दही घ्यावे. तसेच जर दही वापरायचे नसेल तर साध्या पाण्याने पिठ भिजवावे आणि पाकामध्ये लिंबाचा रस घालावा म्हणजे गरजेचा आंबटपणा पुर्‍यांना येतो.
२) तूपाऐवजी तेलात पुर्‍या तळल्या तरी चालतात. पण तुपामुळे पुर्‍यांना खुप छान स्वाद येतो.

सफरचंद डाळींब रायता - Apple Pomegranate Raita

Apple Pomegranate Raita in English

४ ते ६ जणांसाठी
वेळ: १० ते १५ मिनीटे

साहित्य:
१ कप डाळींबाचे दाणे
१ कप बारीक चिरलेले लाल सफरचंद (टीप)
१/२ कप दही
१ टेस्पून दूध
१ हिरवी मिरची, बारीक चिरून
१ टिस्पून साखर
१ टेस्पून कोथिंबीर, बारीक चिरून
चवीपुरते मिठ

कृती:
१) दही आणि दूध एकत्र घोटून घ्यावे. लागल्यास एखादा चमचा दूध घालावे. यामध्ये बारीक चिरलेले सफरचंद घालून मिक्स करावे.
२) आता डाळींबाचे दाणे, हिरवी मिरची, कोथिंबीर, साखर आणि मिठ घालून व्यवस्थित मिक्स करावे. तासभर फ्रिजमध्ये गार करावे. जेवणामध्ये तोंडीलावणी म्हणून सर्व्ह करावे.

टीप:
१) सफरचंद आधीच कापून ठेवू नये, काळे पडते. दही घोटल्यावर मग सफरचंद चिरायला घ्यावे आणि थोडे चिरून झाले कि दह्यात घालावे, म्हणजे सफरचंद काळे पडणार नाही.

ऋषींची भाजी - Rishi Panchami Bhaji

Rishi Panchami Bhaji in English

४ जणांसाठी (प्रत्येकी १ मोठी वाटी)
वेळ: २० मिनीटे

साहित्य:
पाऊण ते एक कप भेंडीचे तुकडे (१ इंच)
४ अळूची मध्यम पाने (टीप)
१/२ कप पडवळाच्या चकत्या
२०० ग्राम लाल भोपळ्याच्या फोडी (मध्यम) (साले काढून)
१/४ कप मटारचे दाणे
१/४ कप पापडी दाणे
१/४ कप मक्याचे दाणे
५-६ बेबी कॉर्न, (१ इंचाचे तुकडे करावे)
२ टेस्पून शेंगदाणे (३ तास भिजवलेले)
२ टिस्पून चिंच (कोळ करून घ्यावा)
१ हिरवी मिरची
१/२ कप ताजा खवलेला नारळ
१ टिस्पून तूप
१/४ टिस्पून जिरे
चवीपुरते मिठ

कृती:
१) अळूची पाने धुवून त्याची देठं कापून घ्यावीत. देठ सोलून वेगळी ठेवावीत. त्याचे बारीक तुकडे करावेत.
२) पाने बारीक चिरून घ्यावीत. कूकरमध्ये अळू (फक्त पाने) १ शिट्टी करून शिजवून घ्यावा.
२) अळूची शिजवलेली पाने मिक्सरमध्ये वाटून घ्यावीत. वाटताना मिरचीही घालावी.
३) कूकर गरम करावा व त्यात तूप-जिर्‍याची फोडणी करावी. त्यामध्ये सर्व भाज्या अळूच्या देठांसह फोडणीस घालाव्यात. थोडावेळ परतून वाटलेली अळूची पाने घालावीत.
४) चिंचेचा कोळ घालावा. चवीपुरते मिठ आणि भाज्या शिजण्यापुरते पाणी घालावे.
५) कूकरचे झाकण बंद करावे आणि मध्यम आचेवर साधारण १५ मिनीटे भाजी शिजू द्यावी. १५ मिनीटांनी गस बंद करावा. वाफ मुरली कि कूकरचे झाकण उघडावे आणि ओला नारळ घालून मिक्स करावे. एक उकळी काढावी.
गरमा गरम भाजी, पोळी किंवा दशमीबरोबर सर्व्ह करावी. हि भाजी नुसती खायलाही चविष्ट लागते.

टीप:
१) मला जितक्या भाज्या मिळाल्या तेवढ्या मी वापरल्या. परंतु ऋषींच्या भाजीमध्ये अजूनही काही भाज्या वापरल्या जातात. यामध्ये मुख्यत: लाल माठ, चवळी, आंबट चुका, अंबाडी यासारख्या पालेभाज्या वापराव्यात. पालक, मेथी, शेपू यांसारख्या उग्र चवीच्या भाज्या वापरू नयेत, भाजीची चव बिघडते. तसेच सुरण, रताळे, अळकुडी (अर्बी) यांसारखे कंदही वापरावेत. काकडी, तोंडली आणि दोडकाही घालता येतो.
२) जर अंबाडीचा पाला वापरणार असाल तर चिंचेचा कोळ घालू नकात अथवा चव पाहून अगदी कमी प्रमाणात घालावा.
३) मी अळूची पाने उकडून, बारीक वाटून घेतली होती. याचे कारण भाजी चांगली मिळून येते. पालेभाज्या नुसत्या बारीक चिरून इतर भाज्यांबरोबर फोडणीस घातल्या तरीही चालेल.
४) आंबट चवीच्या भाज्या आणि चिंच वापरायची नसेल तर भाजी तयार झाल्यावर उकळी काढताना, आंबटपणासाठी १ वाटी घट्ट ताक घालावे आणि थोडावेळ ढवळावे म्हणजे ताक फुटणार नाही.
५) भाजीला तूप-जिर्‍याची फोडणी घातली नाही तरीही चालते. कूकरमध्ये सर्व भाज्या फोडणीशिवाय शिजवाव्यात (वरील कृतीप्रमाणे). आणि भाजी सर्व्ह करताना १ टिस्पून तूप घालून सर्व्ह करावी.
६) भाज्यांचे प्रमाण आवडीनुसार कमीजास्त केले तरीही चालते.

Labels:
Rishi Panchami Bhaji, Rishi chi Bhaji, Ganapati Recipes

पावभाजी प्रकार २ - Pav bhaji

Paavbhaji in English

४ जणांसाठी
वेळ: पूर्वतयारी २० मिनीटे | कूकिंग टाईम ३० मिनीटे

साहित्य:
२ मध्यम कांदे, बारीक चिरून (टीप १)
३ मोठे टोमॅटो, बारीक चिरून
१ टोमॅटोची प्युरी
२ मध्यम बटाटे, उकडून
२ टेस्पून मिरची आले लसूण पेस्ट (२ हिरव्या मिरच्या + ५ लसूण पाकळ्या + १/२ इंच आल्याचा तुकडा)
१/४ कप फ्लॉवरचे तुरे, वाफवलेले
१/४ कप मटार, वाफवलेले
१/४ कप भोपळी मिरची, एकदम बारीक चिरून
१/४ कप गाजर, बारीक चिरून वाफवून घ्यावे
मसाले: १/२ टिस्पून आमचूर पावडर, २ टिस्पून लाल तिखट, १/८ टिस्पून मिरपूड, १ टिस्पून धणेपूड, १/२ टिस्पून गरम मसाला, १/२ टिस्पून बडिशेपची पावडर
१ टेस्पून पावभाजी मसाला
३ टेस्पून बटर + १ टेस्पून तेल
चवीपुरते मिठ
सजावटीसाठी: बारीक चिरलेली कोथिंबीर, बारीक चिरलेला कांदा, लिंबाच्या फोडी

कृती:
१) कढईत तेल आणि बटर गरम करून त्यात बारीक चिरलेला कांदा परतून घ्यावा. कांदा अर्धवट परतला कि आले-लसूण-मिरची पेस्ट घालावी.
२) कांदा निट परतला कि त्यात बारीक चिरलेला टोमॅटो घालून मध्यम आचेवर टोमॅटो एकदम मऊ होईस्तोवर शिजू द्यावा. टोमॅटो प्युरी घालून मध्यम आचेवर २ ते ४ मिनीटे उकळी काढावी. मिश्रण खुप घट्ट झाले थोडे पाणी घालावे.
३) यामध्ये आमचुर पावडर, लाल तिखट, मिरपूड, धणेपूड, गरम मसाला, बडीशेप पावडर, चवीपुरते मिठ आणि थोडा पावभाजी मसाला घालून मिक्स करावे. मिश्रण किंचीत पातळ असावे. हा मिश्रण मसाला पावकरीता वापरू शकतो.
४) यामध्ये अर्धवट मॅश केलेले फ्लॉवर, गाजर आणि मटार घालावे. १ टेस्पून बटर आणि उरलेला पावभाजी मसाला घालावा. उकडलेले बटाटे व्यवस्थित कुस्करून घालावा. पाणी घालावे, ढवळावे. बारीक चिरलेली भोपळी मिरची घालावी. गरजेनुसार मिठ-मसाला घालावा. मध्यम आचेवर ८ ते १० मिनीटे शिजू द्यावे.
गरमागरम पावभाजी मसालापाव बरोबर सर्व्ह करावी. सर्व्ह करताना भाजीवर बटर, कांदा, कोथिंबीर आणि लिंबाचा रस घालावा.

पावभाजी प्रकार १ - कृतीसाठी इथे क्लिक करा

टीप:
१) अमेरकेतील वाचकांसाठी सूचना - १ पांढरा मोठा कांदा आणि ४ मोठे रोमा टोमॅटो (३ चिरून १ प्युरी करून) वापरावे.
२) तिखटपणा आवडीनुसार कमीजास्त करावा.

Labels:
Pav bhaji, bombay chaat, Bombay Pav bhaji, restaurant style pav bhaji

पनीर मखनी - Paneer Makhani

Paneer Makhani in English

२ ते ३ जणांसाठी
वेळ: ३५ ते ४० मिनीटे

साहित्य:
२५० ग्राम पनीर
१/४ कप कांद्याची पेस्ट (टीप ५)
अर्धा ते पाऊण कप टोमॅटो प्युरी (टीप २)
१ टिस्पून आलेलसूण पेस्ट
१ टेस्पून काजूची पेस्ट
अख्खा गरम मसाला - ४ मिरीदाणे, १ तमाल पत्र, १ वेलची, २ लवंगा, १ लहान दालचिनीचा तुकडा
२ चिमटी कसूरी मेथी
१ टिस्पून धणेजिरेपूड
१/२ टिस्पून गरम मसाला
१ टिस्पून लाल तिखट
३ टेस्पून बटर
३ टेस्पून क्रिम किंवा एवेपोरेटेड मिल्क (टीप)
चवीपुरते मिठ

कृती:
१) पनीरचे मध्यम आकाराचे चौकोनी तुकडे किंवा २ इंचाचे लांबडे तुकडे करा. तेलामध्ये डिपफ्राय किंवा शालोफ्राय करून घ्या. (टीप ४)
२) अख्खा गरम मसाल्याचे जे जिन्नस आहेत ते अगदी हलके, कोरडेच भाजून घ्यावे. खलबत्त्यात हे सर्व मसाले एकत्र कुटून घ्यावे.
३) पॅनमध्ये २ टेस्पून बटर गरम करावे. त्यात कुटलेला मसाला घालून काही सेकंद परतावे.
४) त्यात कांद्याची पेस्ट आणि आलेलसूण पेस्ट घालावी. मध्यम आचेवर कांदा शिजेस्तोवर परतावे. (साधारण ४ ते ५ मिनीटे)
५) कांदा शिजला आणि थोडा रंग बदलला कि टोमॅटो प्युरी घालून मध्यम आचेवर काही मिनीटे शिजवावे.
६) टोमॅटो प्युरी शिजल्यावर त्यात कसूरी मेथी, धणेजिरेपूड, गरम मसाला पावडर, लाल तिखट आणि चवीपुरते मिठ घालून मिक्स करावे.
७) आच एकदम मंद करावी. काजू पेस्ट आणि क्रिम घालून जोरजोरात ढवळावे म्हणजे क्रिम फुटणार नाही. थोडे बटर घाला.
एकदा क्रिम निट मिक्स झाले कि तळलेले पनीर घालावे. साधारण ३० सेकंद मंद आचेवर गरम करावे. सर्व्हिंग प्लेटमध्ये भाजी वाढून त्यावर थोडे क्रिम घालून सजवावे.
पोळी किंवा नान बरोबर सर्व्ह करावे.

टीपा:
१) व्यवस्थित पिकलेले आणि लालबुंद टोमॅटो वापरावेत.
२) टोमॅटो प्युरी बनवण्यासाठी, टोमॅटो काचेच्या भांड्यात ठेवावे (साधारण ३-४ मध्यम). टोमॅटो बुडेस्तोवर पाणी घालावे आणि मायक्रोवेव्हमध्ये ४ ते ५ मिनीटे शिजवावे. नंतर टोमॅटो मिक्सरमध्ये एकदम बारीक वाटावे आणि तयार प्युरी चाळणीतून गाळून घ्यावी.
३) जर क्रिम किंवा एवेपोरेटेड मिल्क नसेल तर १/२ ते ३/४ कप मिल्क पावडर घ्यावी त्यात साधारण १/४ कप पाणी घालून दाटसर मिश्रण बनवावे. हे मिश्रण क्रिमऐवजी वापरले तरीही चालते.
४) जर पनीर तळायचे नसेल तर गरम पाण्यात पनीरचे तुकडे काही मिनीटे बुडवून ठेवावे. पनीर छान मऊसर होते.
५) कांद्याच्या पेस्टऐवजी कांदा पातळ उभा चिरून घ्यावा व तेलात चांगला खरपूस तळून घ्यावा. हा तळलेला कांद मिक्सरमध्ये बारीक वाटून मग वरीलप्रमाणेच कृती फॉलो करा.

Labels:
Paneer makhanwala, paneer makhani, butter paneer, paneer butter masala.

शेवई उपमा - Sevai upma

Sevai (vermicelli) Upma in English

वाढणी: २ जणांसाठी
वेळ: १५ मिनीटे
साहित्य:
दिड कप शेवया (उपमा शेवई) [मी Bombino च्या शेवया वापरल्या होत्या]
१ ते सव्वा कप गरम पाणी
१ टेस्पून तूप
फोडणीसाठी: चिमूटभर मोहोरी, १/४ टिस्पून जिरे, चिमूटभर हिंग, १/२ टिस्पून उडीद डाळ, १/२ टिस्पून किसलेले आले
२ ते ३ हिरव्या मिरच्या, चिरलेल्या
३ ते ४ कढीपत्ता पाने
१/४ कप गाजर, एकदम लहान चौकोनी तुकडे
१/४ कप मटार, फ्रोजन
२ टेस्पून तळलेले शेंगदाणे / भाजलेले शेंगदाणे
चवीपुरते मिठ
१/२ टिस्पून साखर
कोथिंबीर सजावटीसाठी

कृती:
१) पॅनमध्ये तूप गरम करावे. त्यात शेवया मध्यम आचेवर गोल्डन रंग येईस्तोवर परताव्यात.
२) भाजलेल्या शेवया पॅनमधून काढाव्यात. उरलेल्या तूपात फोडणीसाठी मोहोरी, जिरे, हिंग, उडीद डाळ, मिरच्या, आले आणि कढीपत्ता घालून परतावे.
३) तयार फोडणीत गाजराचे तुकडे आणि मटार घालून परतावे. २ वाफा काढून मध्यम आचेवर शिजवावे.
४) आता तळलेले शेंगदाणे आणि परतलेल्या शेवया घालाव्यात. मिनीटभर परतावे. आच मध्यम ठेवावी.
५) गरम पाण्यातील अर्धे पाणी घालावे. चवीनुसार साखर आणि मिठ घालावे. झाकण ठेवून मध्यम आचेवर शेवया शिजू द्याव्यात. पाणी शोषले गेले उरलेले गरम पाणी गरजेनुसार घालून शेवया व्यवस्थित शिजू द्याव्यात.
कोथिंबीरीने सजवून गरमागरम शेवयांचा उपमा सर्व्ह करावा.

टीप:
१) शेंगदाण्याबरोबर/ ऐवजी थोडे काजूचे तुकडे घातल्यास छान चव येते.
२) हा उपमा कांदा घालून आणि कांद्याशिवायही छान लागतो. मी शक्यतो कांदा घालत नाही, पण घालायचा असेल तर वरील प्रमाणासाठी १/४ कप बारीक चिरलेला कांदा फोडणीत घालून परतावा. तसेच फरसबीचे तुकडे वा इतर आवडीच्या भाज्याही घालता येतील.

Labels:
sevai Upma, Vermicelli upma, Vermicelli pulav

तोंडली डाळींबी -Tendali Dalimbi

Tondali Dalimbya in English

३ जणांसाठी
वेळ: साधारण ३० मिनीटे

साहित्य:
एक ते सव्वा कप सोललेल्या डाळींब्या (स्टेप १)
१२ ते १५ तोंडली
फोडणीसाठी:
१ टेस्पून तेल, १/४ टिस्पून मोहोरी, १/२ टिस्पून जिरे, चिमूटभर हिंग, १/४ टिस्पून हळद, १/२ टिस्पून लाल तिखट
४ कढीपत्ता पाने
२ टेस्पून सुका नारळ
१ टिस्पून जिरे
१ टिस्पून गूळ
२ आमसुलं
१/४ कप कोथिंबीर
२ टेस्पून ओला नारळ
चवीनुसार मिठ

कृती:
१) साधारण ३/४ कप वाल कोमट पाण्यात १० ते १२ तास भिजत ठेवावे. नंतर पाणी काढून टाकून भिजलेले वाल मोड आणण्यासाठी पंच्यात ८ ते १० तास गच्च बांधून उबदार ठिकाणी ठेवावे. वालाची पुरचूंडी एखाद्या भांड्यात झाकून ठेवावी. डाळींब्यांना मोड आले कि कोमट पाण्यात १० मिनीटे टाकून ठेवावे. डाळींब्या सोलून घ्याव्यात. मोड आलेल्या डाळींब्या हाताळताना त्या अख्ख्या राहतील याची काळजी घ्यावी. साधारण सव्वा ते दिड कप डाळींब्या होतील.
२) तोंडली स्वच्छ धुवून घ्यावीत. प्रत्येक तोंडल्याचे उभे ४ ते ५ काप करावेत आणि गार पाण्यात ठेवून द्यावे.
३) कढईत किसलेला सुका नारळ मध्यम आचेवर भाजून घ्यावे. नंतर जिरे खरपूस भाजून घ्यावे. नंतर भाजलेला नारळ आणि भाजलेले जिरे निट कुटून घ्यावे.
४) कढईत तेल गरम करावे. त्यात मोहोरी घालून तडतडू द्यावी. नंतर जिरे, हिंग, हळद, आणि लाल तिखट घालून फोडणी करावी. कढीपत्ता आणि कोथिंबीर घालावी. थोडावेळ परतून प्रथम चिरलेली तोंडली घालावीत. २ मिनीटे मध्यम आचेवर वाफ काढावी. नंतर डाळींब्या घालाव्यात. हलक्या हाताने परतावे. कढईवर पाण्याची ताटली ठेवून वाफ काढावी. हे शक्य नसेल तर गरजेनुसार पाण्याचा हबका मारावा आणि वाफ काढावी. आमसुलं आणि मिठ घालून वाफ काढावी. तसेच भाजलेले जिरे-खोबरेही घालावे.
५) डाळींब्या आणि तोंडली साधारण शिजत आले कि गूळ घालून वाफ काढावी. डाळींब्या खुप नाजुक असतात पटकन मोडल्या जातात म्हणून हलक्या हाताने परतावे.
भाजी तयार झाली कि ओला नारळ घालावा. गरमागरम पोळ्यांबरोबर सर्व्ह करावे.

टीप:
१) आमसुलाऐवजी चिंचेचे पाणी वापरू शकतो.
२) काही जणांना हि भाजी रसदार आवडते तेव्हा शिजवताना गरजेपुरते पाणी घालावे.
३) या भाजीला थोडा गोडा मसाला (महाराष्ट्रीयन मसाला) घातल्यास छान स्वाद येतो.

Labels:
Tondli Dalimbya usal bhaji, gherkins sabzi, ivy gourd

समोसा चाट - Samosa Chat

Samosa Chat in English

वेळ: ३० ते ४० मिनीटे (समोसे तयार असल्यास)
सर्व्हींग - ३ जणांसाठी

साहित्य:
६ तयार समोसे (मध्यम आकाराचे) - समोसा रेसिपीसाठी इथे क्लिक करा
१/४ कप हिरवी चटणी
१/४ कप चिंचगूळाची चटणी किंवा खजूराची चटणी (कृतीसाठी इथे क्लिक करा)
१/२ कप घोटलेले दही + चिमूटभर मिठ
१ टिस्पून चाट मसाला
१/२ टिस्पून सैंधव मिठ (काळे मिठ)
१/२ टिस्पून लाल तिखट
१/२ कप बारीक चिरलेला कांदा
१/२ कप बारीक चिरलेला टोमॅटो
२ टेस्पून बारीक चिरलेली कोथिंबीर
१/४ बारीक शेव
चना मसाला ग्रेव्ही
१ कप शिजलेले पांढरे चणे (काबुली चणे)
फोडणीसाठी: १ टिस्पून तेल, दोन चिमटी जिरे, चिमूटभर हिंग, १/४ टिस्पून हळद, १ टिस्पून लाल तिखट
१/२ कप चिरलेला कांदा + २ लसूण पाकळ्या + १/२ इंच आले + १ हिरवी मिरची ची पेस्ट
१ मध्यम टोमॅटोची प्युरी
१ टिस्पून छोले मसाला
१/४ टिस्पून आमचुर पावडर
चवीपुरते मिठ



कृती:
चना मसाला ग्रेव्ही
१) कढईत तेल गरम करून त्यात जिरे, हिंग, हळद, आणि लाल तिखट घालून फोडणी करावी. त्यात कांदा+ लसूण + आले + हिरवी मिरची यांची पेस्ट घालून परतावे. कांदा परतला गेला कि त्यात टोमॅटोची प्युरी घालून एक उकळी काढावी. शिजलेले चणे, आमचुर पावडर, छोले मसाला आणि चवीपुरते मिठ घालावे. थोडे पाणी घालून कढईवर झाकण ठेवून ५ ते ७ मिनीटे चणे शिजवावे.
समोसा चाटसाठी
२) ३ प्लेट्स तयार कराव्यात. प्रत्येक प्लेटमध्ये २ समोसे ठेवावे आणि किंचीत फोडून घ्यावे. त्यावर १ डाव चण्याची ग्रेव्ही घालावी. त्यावर चिरलेला कांदा आणि टोमॅटो घालावा. चाट मसाला आणि सैंधव मिठ भुरभूरावे. नंतर हिरवी चटणी आणि गोड चटणी घालावी. घोटलेले दही घालावे. परत गोड चटणी आणि हिरवी चटणी घालावी. थोडे लाल तिखट भुरभूरावे. कोथिंबीर आणि शेव घालून सजावट करावी.

Labels:
Samosa Chat,Indian Chaat Recipe, Samosa Chaat

पंजाबी समोसा - Punjabi Samosa

Punjabi Samosa in English

साधारण १५ ते १६ मध्यम समोसे
वेळ: पूर्वतयारी (भाजी, मैद्याचे भिजवलेले पिठ) - २५ मिनीटे । समोसे - २० मिनीटे

समोसा, खजूराच्या चटणी बरोबर खुप छान लागतो. खजूर-चिंचेच्या आंबटगोड चटणीसाठी इथे क्लिक करा.
तसेच हे समोसे वापरून चविष्ट असे समोसा चाट बनवू शकतो. - समोसा चाटची कृती
साहित्य:
४ मध्यम बटाटे
१ कप मटार (फ्रोजन)
फोडणीसाठी: १ टेस्पून तेल, १/४ टिस्पून जिरे, २ चिमटी हिंग, १/२ टिस्पून लाल तिखट
८ ते १० हिरव्या मिरच्या
१/२ इंच आले
१/२ टिस्पून बडीशेप
७ ते ८ मिरीदाणे, कुटलेले
१ टिस्पून गरम मसाला
१/४ टिस्पून धणे-जिरेपूड
चवीपुरते मिठ
१/२ टिस्पून साखर
तळण्यासाठी तेल
कव्हरसाठी
२ कप मैदा
३ टेस्पून तेल
अर्धा ते १ टिस्पून ओवा
चवीपुरते मिठ
पाणी, पिठ मळण्यासाठी

कृती:
बटाट्याचे स्टफिंग
१) बटाटे उकडून घ्यावे. सोलून, चिरून घ्यावे.
२) हिरव्या मिरच्या कुटून त्याची पेस्ट करून घ्यावी. आले बारीक किसून घ्यावे. किंवा आल्याची पेस्ट वापरावी.
३) कढईत १ टेस्पून तेल गरम करावे. त्यात जिरे, हिंग, लाल तिखट आणि बडीशेप घालून १० सेकंद परतावे. नंतर हिरवी मिरचीची पेस्ट आणि किसलेले आले घालावे. काही सेकंद परतावे.
४) नंतर वाटाणे घालावेत. झाकण ठेवून २ ते ३ मिनीटे शिजू द्यावे. नंतर चिरलेले बटाटे घालून व्य्वस्थित मिक्स करावे. वाटल्यास मॅशरने थोडे मॅश करून घ्यावे. पण जास्तही मॅश करू नयेत. आता मिठ, गरम मसाला, आमचूर पावडर, धणेजिरेपूड, साखर आणि कुटलेली काळी मिरी घालावी. व्यवस्थित मिक्स करावे. झाकण ठेवून मंद आचेवर २ ते ३ मिनीटे वाफ काढावी. समोसे बनवण्यापूर्वी हे मिश्रण पूर्ण गार होवू द्यावे.
समोशाच्या कव्हरसाठी
१) एका मिक्सिंग बोलमध्ये मैदा आणि तेल एकत्र करावे. पिठाला तेल समान लागेल असे मिक्स करून घ्यावे. ओवा आणि मिठ घालावे. पाणी घालून मध्यमसर मळून घ्यावे. २० मिनीटे झाकून ठेवावे.
२) २० मिनीटांनी मळलेले पिठ ८ ते १० समान गोळ्यांमध्ये विभागून घ्यावे.
समोसा
१) विभागलेल्या गोळ्यापैकी एक गोळा गोल आकारात, पातळसर लाटून घ्यावा. सुरीने मधोमध कापून, २ समान अर्धे भाग करावे. कडेला पाण्याचे बोट लावावे. दोन कडा जोडून व्यवस्थित सिल करून घ्याव्यात. कडा जोडल्यावर कोनसारखा आकार तयार होईल. या कोनमध्ये १ चमचा सारण भरून किंचीत आत ढकलावे. ओपन असलेली बाजू एकावर एक ठेवून जोडावी आणि सिल करावी. अशाप्रकारे सर्व समोसे तयार करावेत.
२) समोसे तळण्यासाठी कढईत तेल गरम करावे. समोसे तेलात बुडतील इतपत तेल असावे. समोसे मध्यम आचेवर सोनेरी रंगावर तळून घ्यावे.
समोसे हिरव्या चटणीबरोबर किंवा खजूराच्या आंबटगोड चटणीबरोबर सर्व्ह करावे.

Labels:
Punjabi Samosa, North Indian Snack, Samosa Recipe

पालकाची भजी - Palak Bhajji

Palak Pakoda in English

२ जणांसाठी (साधारण १० ते १२ भजी)
वेळ: २० मिनीटे

साहित्य:
२ ते अडीच कप भरडसर चिरलेली पालकाची पाने
१/४ कप कांदा, उभे पातळ काप
६ ते ७ टेस्पून बेसन
१ टेस्पून तांदूळ पिठ
१/२ टिस्पून आलेलसूण पेस्ट
५ ते ७ कढीपत्त्याची पाने, बारीक चिरून
१ टिस्पून तिळ (ऐच्छिक)
१ टिस्पून कसूरी मेथी
१/२ टेस्पून लाल तिखट किंवा गरजेनुसार
१/४ टिस्पून हळद
चिमूटभर खायचा सोडा
चवीपुरते मिठ
२ ते ३ टेस्पून पाणी
तेल, भजी तळण्यासाठी

कृती:
१) मोठ्या वाडग्यात चिरलेला पालक, कांदा आणि मिठ घालून मिक्स करावे. १० मिनीटे तसेच ठेवावे म्हणजे कांद्याला थोडे पाणी सुटेल.
२) नंतर त्यावर प्रथम एकूण बेसनपैकी ४ टेस्पून बेसन आणि तांदूळ पिठ पेरावे. १ टिस्पून तेल कडकडीत गरम करून पिठावर घालावे. २ मिनीटांनी हलकेच चमच्याने मिक्स करावे. अंदाज घेऊन उरलेले बेसनही घालावे.
३) आता उरलेले जिन्नसही घालावेत. (आलेलसूण पेस्ट, कसूरी मेथी, तिळ, लाल तिखट, हळद, सोडा, आणि थोडे मिठ) सर्व निट मिक्स करा. लागल्यास अगदी थोडे पाणी घाला आणि चिकटसर असा गोळा तयार करा. हे मिश्रण पातळ नको, घट्ट पण चिकटसर गोळा बनवा.
४) भजी तळण्यासाठी कढईत तेल तापवा आणि आच मिडीयम-हायवर ठेवा. छोटी छोटी बोंडं, गोल्डन ब्राऊन आणि कुरकूरीत होईस्तोवर तळा. तेल टिपण्यासाठी टिश्यु पेपरवर काढा.
गरमा गरम भजी टोमॅटो केचप, हिरवी चटणी किंवा लसणीच्या तिखटाबरोबर सर्व्ह करावी.

टीप्स:
१) पालकाबरोबर थोडी मेथी घातल्यास खुप छान चव येते.
२) १ टिस्पून गरम तेल भजीच्या पिठात घातल्याने भजी छान कुरकूरीत होतात.
३) भजी एकदम मोठ्या आचेवर किंवा कमी आचेवर तळू नयेत. मोठ्या आचेवर तळल्याने भजी बाहेरून लगेच ब्राऊन होतात पण आतमध्ये कच्च्याच राहतात. तसेच एकदम कमी आचेवर तळल्या तर तेलकट होतात. म्हणून नेहमी मिडीयम ते मिडीयम हायवर तळावे.
४) खायचा सोडा घातल्याने भजी हलक्या होतात. पण जास्त प्रमाणात सोडा घातल्यास भजी तेल पितात.
५) पाण्याचे प्रमाण गरजेपेक्षा जास्त पडले तर मिश्रण पातळ होईल आणि भजी कुरकूरीत होणार नाहीत.

Labels:
Palak bhaji, Spinach Pakoda, Palak Pakoda