वांग्याचे भरीत - vangyache bharit

Baingan Bharta in English

वेळ: वांग भाजण्यासाठी: भाजण्याच्या पद्धतीनुसार । पाकृसाठी वेळ: ५ ते १० मिनीटे
वाढणी: ३ ते ४ जणांसाठी

साहित्य:
१ मोठे वांगे
१ मोठा कांदा, बारीक चिरून (साधारण ३/४ ते १ कप)
३ हिरव्या मिरच्या, उभ्या चिरून
फोडणीसाठी: १ टेस्पून तेल, २ चिमटी मोहोरी, १ चिमटी जिरे, १/८ टिस्पून हिंग, १/८ टिस्पून हळद
चवीपुरते मिठ
कोथिंबीर सजावटीसाठी

कृती:
१) वांगं भाजून घ्यावं.
i) गॅसवर: गॅसच्या शेगडीवर वांगं भाजण्यासाठी आधी वांग्याला किंचीत तेल चोळून घ्यावे आणि आचेवर भाजावे. मधेमधे वांगं फिरवावे म्हणजे सर्व ठिकाणी वांगं निट भाजले जाईल. (नोट- गॅसवर वांगं भाजताना वांग्यातील पाणी शेगडीवर पडून डाग पडतात. पण थोडे घासून स्वच्छ करता येते.)
ii) ओव्हनमध्ये: ओव्हन ४०० F वर प्रिहीट करावे. वांग्याला बाहेरून तेल लावून सुरीने किंवा काट्याने (Fork) काहीवेळा टोचावे. अल्युमिनीयम फॉइलमध्ये गुंडाळून ४५ ते ५० मिनीटे बेक करावे. (या पद्धतीने वांग्याचा आतील गर शिजतो पण थेट विस्तवावर भाजल्याने जो स्वाद येतो तो मात्र येत नाही.)
iii) बार्बेक्यु ग्रिलसुद्धा वांगं भाजायला वापरू शकतो.
iv) फायरप्लेस (टीप): ऐकायला मजेशीर वाटेल पण मी वांगं फायरप्लेसमध्ये भाजलं. वांग्याला तेल लावून काहीवेळा सुरीने किंवा काट्याने टोचून घ्यावे. अल्युमिनीयम फॉइलमध्ये व्यवस्थित गुंडाळून घ्यावे. फायरप्लेसमध्ये वरच्या बाजूस धूर बाहेर जाण्यासाठी छोटी खिडकी असते ती प्रथम उघडावी. नंतर २ ते ३ जाडसर फांद्या फायरप्लेसमध्ये रचाव्यात. खाली १-२ नारळाच्या करवंट्या ठेवाव्यात. १-२ चमचे तेल फांद्यांवर शिंपडावे. जागा करून मधल्या जागी वांगं ठेवावे. आग पेटवावी. लागल्यास पेपर किंवा कार्डबोर्डचे तुकडे वापरून आग सुरू करावी. शेकोटी व्यवस्थित पेटल्यावर १० ते १५ मिनीटात वांग भाजलं जातं. वांगं भाजलं गेल्यावर अगदी सांभाळून पापड तळायच्या चिमट्याने बाहेर काढावे.

२) वांगं थोडं गार होवू द्यावं. सालं काढून शेंडी कापून टाकावी. आतील गर जाडसर कापून घ्यावा.
३) वांगं आणि कांदा एकत्र करावा. वांगं भाजल्यावर त्यातून जो रस निघतो तो फेकून देवू नये, तोही वापरावा.
४) कढईत तेल तापवून मोहोरी, जिरे, हिंग, हळद घालून फोडणी करावी. मिरची परतावी. नंतर कांदा-वांग्याचे मिश्रण घालून २-३ मिनीटे परतावे. कोथिंबीरीने सजवून भाकरीबरोबर सर्व्ह करावे.

टीप:
१) वांगं भाजण्यासाठी बाजारात जो फायर स्टार्टर लॉग मिळतो तो वापरला नव्हता कारण तो बनवण्यासाठी कोणत्या गोष्टी किंवा रसायनं वापरतात ते माहीत नसतं. म्हणून झाडाच्या तुटलेल्या फांद्याच वापरल्या होत्या.

नवलकोलची भाजी - navalkol chi bhaji

Navalkol Bhaji in English

वेळ: २५ मिनीटे
वाढणी: ३ जणांसाठी

साहित्य:
२ मध्यम आकाराचे नवलकोल
फोडणीसाठी: १ टेस्पून तेल, २ चिमटी मोहरी, २ चिमटी जिरे, १/४ टिस्पून हळद, २ ते ३ कढीपत्ता
२ हिरवी मिरची
२ टेस्पून ताजा नारळ
१/२ टिस्पून साखर किंवा चवीनुसार
चवीपुरते मिठ

कृती:
१) नवलकोल सोलून मध्यम आकाराचे चौकोनी तुकडे करावेत.
२) पॅनमध्ये तेल गरम करून मोहरी, जिरे, हळद, कढीपत्ता व मिरची घालून फोडणी करावी.
३) नवलकोल फोडणीस टाकावा आणि थोडे मिठ घालावे. झाकण ठेवून नवलकोल शिजू द्यावा. मधेमधे थोडे पाणी शिंपडावे म्हणजे नवलकोल शिजायला मदत होईल व करपणार नाही. किंवा पाण्याचे ताट पॅनवर ठेवून नवलकोल शिजवावा.
४) नारळ आणि साखर घालून दोनेक मिनीटे परतावे. कोथिंबीरीने सजवून पोळीबरोबर सर्व्ह करावी.

टीप:
१) पाणी थोडे थोडे शिंपडावे, एकदम खुप पाणी ओतू नये. चव बिघडते.

दुधीची भाजी - Dudhichi Bhaji

Bottle gourd Sabzi in English

वेळ: १५ ते २० मिनीटे
वाढणी: २ ते ३ जणांसाठी


साहित्य:
२ कप, दुधीचे मध्यम चौकोनी तुकडे (दुधी सोलून आतील बिया काढणे)
१ टिस्पून + १ टिस्पून तूप
१/४ टिस्पून जिरे
२ ते ३ टेस्पून दाण्याचा कूट
१/४ ते १/२ कप दुध
चवीपुरते मिठ
२ लाल सुक्या मिरच्या
१/२ टिस्पून उडदाची डाळ
सजावटीसाठी, बारीक चिरलेली कोथिंबीर

कृती:
१) कढईत १ टिस्पून तूप गरम करून त्यात जिरे घालून फोडणी करावी. जिर्‍याचा रंग थोडा बदलला कि त्यात दुधी फोडणी़स घालावा. मिठ घालावे. १-२ वाफा काढाव्यात.
२) नंतर दुध घालावे आणि दुधी शिजू द्यावा. दुधी शिजला कि दाण्याचा कूट घालून १-२ मिनीट शिजवावे.
३) भाजी तयार झाली कि लहान कढल्यात १ टिस्पून तूप गरम करावे. २ लाल मिरच्या हाताने तोडून घ्याव्यात. आधी उडदाची डाळ फोडणीस टाकून गुलाबी होवू द्यावी. नंतर लगेच मिरच्या घालून फोडणी तयार करावी. हि फोडणी तयार भाजीवर घालून भाजी लगेच सर्व्ह करावी.

टीप:
१) बरेचजण उपवासाला दुधी खातात. तेव्हा हि भाजी नुसती किंवा साबुदाण्याच्य खिचडीबरोबर भरीला खाऊ शकतो. फक्त वरून जी तूप-जिरे-उडीद डाळ यांची फोडणी घातली आहे ती घालू नये.

दुधी हलवा - Dudhi Halwa

Dudhi Halwa in English

वेळ: साधारण ३० मिनीटे
वाढणी: ३ ते ४ जणांसाठी

साहित्य:
अडीच कप किसलेला दुधी भोपळा (सोलून बिया काढून)
१ टिस्पून तूप
पाऊण कप कंडेन्स मिल्क
१ टिस्पून चारोळी (३ तास कोमट पाण्यात भिजवावी)
१ टेस्पून बदामाचे काप, (बदाम भिजवून साल काढावे)
१ टेस्पून इतर ड्राय फ्रुट्स जसे काजू, पिस्ता, बेदाणे
१/४ टिस्पून वेलची पूड

कृती:
१) पॅन गरम करून त्यात तूप घालावे. तूप वितळले कि किसलेला दुधी घालून परतावे. मिडीयम-हाय हिटवर परतत राहावे.
२) साधारण ५ ते ८ मिनीटांनी दुधीमधील पाणी निघून जाईल. आता किसलेल्या दुधीची एक काडी चावून पाहावी. जर कच्चेपणा वाटत असेल तर अजून काही मिनीटे शिजवावे.
३) दुधी शिजला कि कंडेन्स मिल्क घालावे आणि घट्ट्पणा येईस्तोवर परतत राहावे. सुकामेवा घालावा, वेलची पूड घालून मिक्स करावे. थोडावेळ परतून घ्यावे.
असा हा झटपट दुधी हलवा गार किंवा कोमट कसाही छान लागतो.

टीप:
१) कंडेन्स मिल्कचे प्रमाण आवडीप्रमाणे कमी जास्त करावे.
२) दुधी शिजवताना झाकण न ठेवता शिजवावा.

दुधी हलवा रेसिपी - दुध आणि साखर वापरून

आलू मेथी - Aloo Methi

Aloo Methi in English

वेळ: ३० ते ४० मिनीटे
वाढणी: २ ते ३ जणांसाठी

साहित्य:
३ कप बारीक चिरलेली मेथीची पाने
१ मध्यम बटाटा, (सोलून मध्यम तुकडे करावेत)
१ लहान कांदा, बारीक चिरून (साधारण १/२ कप)
१ लहान टोमॅटो
फोडणीसाठी:- दिड टेस्पून तेल, २ चिमटी मोहोरी, १ चिमटी जिरे, १ चिमटी हिंग, १/४ टिस्पून हळद
२ ते ३ हिरव्या मिरच्या, उभ्या चिरून
चवीपुरते मिठ

कृती:
१) टोमॅटो प्युरी - टोमॅटो काचेच्या वाडग्यात ठेवून त्यात टोमॅटो बुडतील इतपत पाणी घालावे. २ मिनीटे मायक्रोवेव्हमध्ये शिजवावे. पाणी काढून मिक्सरमध्ये प्युरी करावी आणि गाळून घ्यावी.
२) कढईत तेल गरम करावे. त्यात मोहोरी, जिरे, हिंग हळद, आणि मिरच्या घालून फोडणी करावी. त्यात कांदा घालून ५० % शिजवावा. नंतर बटाट्याचे तुकडे घालावेत (टीप १). मिक्स करून झाकण ठेवावे आणि बटाटा शिजू द्यावा. बटाटा कढईला चिकटू नये म्हणून मधेमध्ये ढवळावे.
३) टोमॅटो प्युरी घालून मोठ्या आचेवर परतावे. जोवर टोमॅटो प्युरी चांगली आळत नाही तोवर परतत राहावे.
४) आता चिरलेली मेथी घालून बरोबर २-३ चिमटी मिठ घालावे. खुप जास्त मिठ घालू नये कारण मेथी शिजल्यावर आळते आणि एकदम कमी होते. मेथीसुद्धा मोठ्या आचेवर परतावी.
५) मेथीमधील पाण्याचा अंश निघून गेला कि आच कमी करून १-२ मिनीटे परतावे. चव पाहून लागल्यास मिठ घालावे.
भाजी गरम गरम पोळीबरोबर सर्व्ह करावी

टीपा:
१) उकडलेला बटाटाही वापरू शकतो. फक्त बटाट्याच्या फोडी मेथी परतल्यावर घालाव्यात.
(फोडणी + कांदा पुर्ण शिजवणे + टोमॅटो प्युरी घालून आटवणे + मेथी व मिठ घालून मेथी + आळेस्तोवर परतावे + उकडलेल्या बटाट्याच्या फोडी घालून काही मिनीटे परतावे)
२) हि भाजी कुठल्याही मसाल्याशिवाय छान लागते. तरी आवडीप्रमाणे मसाल्याचा वापर करू शकतो (धणेजिरेपूड, गरम मसाला)
३) कांद्याऐवजी लसूणही वापरू शकतो. १ टिस्पून लसूण पेस्ट वापरावी.

गवारीची भाजी - Gawarichi Bhaji

Gawarichi Bhaji in English

वेळ: पूर्वतयारी १५ मिनीटे । पाकृसाठी २० मिनीटे
वाढणी: २ ते ३ जणांसाठी

साहित्य:
पाव किलो गवार
फोडणीसाठी:- १ टेस्पून तेल, २ चिमटी मोहोरी, १ चिमटी जिरे, २ चिमटी हिंग, १/४ टिस्पून हळद, १/४ टिस्पून लाल तिखट
१ मध्यम बटाटा, सोलून मध्यम फोडी कराव्यात (टीप १ व २)
२ ते ४ टेस्पून ताजा नारळ
१ टेस्पून दाण्याचा कूट
२ टिस्पून गूळ किंवा चवीपुरता
१/२ टिस्पून गोडा मसाला
चवीपुरते मिठ

कृती:
१) गवार स्वच्छ धुवून घ्यावी. प्रत्येक गवारीची दोन्ही बाजूची देठं मोडावीत आणि शिर असेल तर काढून टाकावी. गवारीचे १/२ ते १ इंचाचे तुकडे मोडून घ्यावेत.
२) गवार कूकरमध्ये २ शिट्ट्या करून वाफवून घ्यावी. वाफवताना गवारीमध्ये पाणी घालू नये. (वाफवण्यासाठी कूकरच्या तळाशी १ इंच पाणी असावे. गवार कूकरच्या आतील डब्यात ठेवावी व या डब्यात पाणी घालू नये.)
३) कढईत तेल गरम करावे. मोहोरी, जिरे, हिंग, हळद घालून फोडणी करावी. प्रथम बटाटे फोडणीस टाकावे. २-३ वाफा काढून बटाटा शिजू द्यावा. बटाटा ८० ते ९० % शिजला कि वाफवलेली गवार घालावी. निट मिक्स करावे.
४) लाल तिखट, गोडा मसाला, नारळ, दाण्याचा कूट आणि थोडे मिठ घालावे. मध्यम आचेवर १-२ वाफा काढाव्यात. नंतर गूळ घालून १ वाफ काढावी.
हि भाजी पोळीबरोबर किंवा गरमगरम तूप-वरण-भाताबरोबर झकास लागते.

टीप:
१) शिजवलेला बटाटाही वापरू शकतो. फक्त बटाटा शिजवून थोडावेळ फ्रिजमध्ये ठेवावा. गवार आणि बटाटा एकत्रच फोडणीस घालावे, बटाटा शिजलेला असल्या कारणाने अजून शिजवायची गरज नाही.
२) बटाट्याऐवजी काळे वाटाणे गवारीच्या भाजीत अधिक छान लागतात. जर काळे वाटाणे वापरायचे असतील तर ७-८ तास वाटाणे पाण्यात भिजत ठेवावेत व कूकरमध्ये शिजवून घ्यावेत.
३) हि भाजी थेट कूकरमध्येही फोडणीस टाकू शकतो, म्हणजे गवार वेगळी शिजवायची गरज नाही. लहान कूकरमध्ये फोडणी करून घ्यावी. त्यात मोडलेली गवार, बटाटा/ भिजवलेले काळे वाटाणे फोडणीस टाकावे. इतर साहित्यही घालावे व थोडे पाणी घालावे. २ ते ३ शिट्ट्या होवू द्याव्यात. वाफ मुरली कि कूकर उघडून वाटल्यास १ उकळी काढावी.

मोरावळा - Moravla

Moravla in English (Amla or gooseberry preserves)

साहित्य:
१ कप आवळ्याचा किस
१ कप साखर
२ ते ३ लवंगा

कृती:
१) कूकरमध्ये तळाला १ इंच पाणी घालावे.
२) आवळ्याचा किस आणि साखर एकत्र मिक्स करून घ्यावे. कूकरच्या आतील स्टीलच्या डब्यात हे मिश्रण आणि लवंगा एकत्र करावे. या मिश्रणात पाणी अजिबात घालू नये. हा डबा कूकरमध्ये ठेवून १ ते २ शिट्ट्या कराव्यात. गॅस बंद करावा.
३) १० मिनीटांनी कूकर उघडून मिश्रण बाहेर काढावे -
i) जर मोरावळा फ्रिजमध्ये ठेवायचा असेल आणि थोडा पातळसरच हवा असेल तर थेट काचेच्या बरणीत भरून झाकण लावावे व फ्रिजमध्ये ठेवावे.
ii) जर मोरावळा बाहेर ठेवायचा असेल तर कूकरमधून बाहेर काढलेले मिश्रण पातेल्यात घालून, २ तारी पाक होईस्तोवर आटवावे. गार झाले कि बरणीत भरून ठेवावे.

टीप:
१) स्वादाकरता लवंग वापरण्याऐवजी, आवडीनुसार वेलची किंवा दालचिनीही वापरू शकतो.

भोपळा बटाटा भाजी - Bhopla Batata bhaji

Bhopla Batata Bhaji in English

वेळ: २० ते २५ मिनीटे
वाढणी: २ ते ३ जणांसाठी

साहित्य:
१ कप बटाट्याच्या चौकोनी फोडी
१ कप भोपळ्याच्या चौकोनी फोडी
१ टेस्पून तूप
१/२ टिस्पून जिरे
२ ते ३ हिरव्या मिरच्या, उभ्या चिरून
२ टेस्पून ओलं खोबरं
२ टेस्पून शेंगदाण्याचा कूट
साधारण १/४ कप ताक (टीप १)
चवीपुरते मिठ
कोथिंबीर बारीक चिरून

कृती:
१) कढईत तूप गरम करून जिरे फोडणीस टाकावे. नंतर हिरव्या परताव्या व त्यावर बटाट्याच्या फोडी घालून निट ढवळावे. ३-४ चमचे पाणी घालावे. २ वाफा काढाव्यात.
२) नंतर भोपळ्याच्या फोडी आणि मिठ घालून मिक्स करावे. वाफ काढावी. वाफ काढताना थोडा ताकाचा हबका मारावा. ओलं खोबरं घालून मिक्स करावे. भोपळा शिजेस्तोवर २-३ वाफा काढाव्या. शेंगदाण्याचे कूट घालून हलक्या हाताने मिक्स करावे.
गरमा गरम भाजी पोळीबरोबर छान लागते तसेच उपासाला बदल म्हणून नुसती खायलाही चांगली वाटते.

टीप:
१) भाजी परतताना जर भाजीला ओलसरपणा कमी वाटला तेवढ्यापुरताच ताकाचा हबका मारावा.

वरी तांदूळ पुलाव - Samo Rice Pulav

Samo Rice Pulao in English

वेळ: २५ ते ३० मिनीटे
वाढणी: ३ ते ४ जणांसाठी

>साहित्य:
१ कप वरी तांदूळ
२ टिस्पून तूप
१/२ टिस्पून जिरे
२ हिरव्या मिरच्या
१/२ कप भोपळ्याचे मध्यम तुकडे (साल काढून टाकावे)
१/२ कप बटाट्याचे तुकडे (बटाटा सोलून)
२ टेस्पून शेंगदाण्याचा कूट
चवीपुरते मिठ
साधारण ३ कप उकळते पाणी

कृती:
१) जाड बुडाच्या पातेल्यात वरी तांदूळ थोडे भाजून घ्यावे, म्हणजे भात हलका होतो. तांदूळ एका भांड्यात तात्पुरता काढून ठेवावेत.
२) त्याच पातेल्यात तूप गरम करावे त्यात जिरे आणि मिरच्या घालून परतावे. गॅस मध्यम ठेवावा. बटाट्याच्या फोडी घालून एक वाफ काढावी. बटाटा जवळजवळ शिजला कि त्यात वरी तांदूळ घालावेत.
३) मिक्स करून त्यात गरम पाणी घालावे. मिठ घालावे. एक दोन मिनीटांनी भोपळ्याच्या पातळ फोडी आणि दाण्याचा कूट घालावा. मध्यम आचेवर वाफ काढावी.
गरमागरम वरीचा पुलाव दाण्याच्या आमटीबरोबर किंवा फोडणीच्या ताकाबरोबर सर्व्ह करावा.

ज्वारीची भाकरी - Jwarichi chi Bhakari

Jowar Bhakari in English

वेळ: २५ मिनीटे
वाढणी: ४ ते ५ मध्यम भाकर्‍या

साहित्य:
२ कप ज्वारीचे पिठ
अंदाजे दिड ते दोन कप गरम पाणी
१ टेस्पून लोणी किंवा तूप
१/४ टिस्पून मिठ
१/२ ते पाऊण कप ज्वारीचे पिठ भाकरी थापायला किंवा लाटायला

भोगीची भाजी रेसिपी

कृती:
१) पातेल्यात पाणी गरम करून त्यात १ टेस्पून लोणी सोडावे. पाणी चांगले गरम झाले कि परातीत ज्वारीचे पिठ आणि मिठ घालून मिक्स करावे. त्यात पाणी बेताबेताने ओतावे. हळू हळू मिक्स करून मळावे. पिठ चांगले मळले गेले पाहिजे.
२) मळलेल्या पिठाचे ४ किंवा ५ गोळे करावे व लगेच भाकरी करण्यास घ्यावी.
३) तवा गरम झाला कि गॅस मिडीयम हाय हिटवर ठेवावा. मळलेल्या पिठाचा गोळा कोरड्या पिठात बुडवून हलक्या हाताने लाटावा (टीप १). लागल्यास अजून थोडे कोरडे पिठ घ्यावे. भाकरी मध्यमसर जाड ठेवावी.
४) भाकरी तव्यावर टाकावी. वरच्या बाजूने हाताने किंवा सुती कापडाने पाणी लावावे. पाणी सुकत आले कि भाकरी पलटावी व दुसर्‍या बाजूने भाजावी. (महत्त्वाची टीप २)
गरमागरम भाकरीवर लोणी घालून झुणका, पिठलं किंवा वांगं-बटाटा-कांदा अशा मिक्स रस्सा भाजीबरोबर छान लागते.

टीप:
१) भाकरी थापूनही करू शकतो. पिठाचा गोळा थोड्या जास्त पिठावर हलके हलके थापावा व भाकरी वाढवत न्यावी.
२) माझ्या घरी इलेक्ट्रिक स्टोव्ह कॉईल असल्याने आचेवर भाजता येत नाही. पण घरी विस्तवाची (flame) शेगडी असेल तर भाकरीची एक बाजू तव्यावर शेकावी. दुसर्‍या बाजूला लावलेले पाणी सुकले कि फुलके भाजायच्या चिमट्याने दुसरी बाजू थेट आचेवर ठेवावी. चिमट्याच्या मदतीने थोडी गोलगोल फिरवावी म्हणजे जळणार नाही.
३) भोगीच्या दिवशी भोगीची भाजी आणि ज्वारी/बाजरीची भाकरी खातात. भाकरीवर तिळ लावून भाकरी भाजतात. भाकरी लाटताना/ थापताना वरून तिळ पेरावे आणि मग लाटावी/ थापावी.

भोगीची भाजी - Bhogi Bhaji

Bhogichi Bhaji in English

वेळ: पूर्वतयारी २० मिनीटे । पाकृसाठी: १५ ते २० मिनीटे
वाढणी: ३ ते ४ जणांसाठी

साहित्य:
१ मोठा बटाटा, सोलून मध्यम फोडी (साधारण १ ते दिड कप)
१ मध्यम वांगे किंवा ३ ते ४ भरायची लहान वांगी (साधारण १ ते सव्वा कप मध्यम फोडी)
१ कप गाजराचे मध्यम तुकडे
१/२ कप ओले चणे (मी फ्रोजन वापरले होते)
१/४ कप भिजवलेले शेंगदाणे (२-३ तास भिजवणे)
१/४ कप पावट्याचे दाणे (ऐच्छिक)
६ तुकडे शेवगा शेंगेचे (३ इंचाचे तुकडे) (टीप)
फोडणीसाठी - २ टेस्पून तेल, २ चिमटी मोहोरी, २ चिमटी हिंग, १/४ टिस्पून हळद, १/२ टिस्पून लाल तिखट,१/४ टिस्पून जिरे
३-४ कढीपत्ता पाने
२ टेस्पून भाजलेल्या तिळाचा कूट
२ टिस्पून काळा मसाला - रेसिपीसाठी इथे क्लिक करा
२ टेस्पून चिंचेचा दाट कोळ
१ ते दिड टेस्पून किसलेला गूळ
१/४ कप ओलं खोबरं
चवीपुरते मिठ

कृती:
१) पातेल्यात तेल गरम करून मोहोरी, जिरे, हिंग, हळद, लाल तिखट, आणि कढीपत्ता घालून फोडणी करावी. प्रथम बटाटा, ओले चणे, पावटे, शेवग्याच्या शेंगा आणि शेंगदाणे घालून २ वाफा काढाव्यात.
२) नंतर वांगं आणि गाजर घालून मिक्स करावे. थोडे पाणी घालून पातेल्यावर झाकण ठेवावे. मध्यम आचेवर शिजू द्यावे.
३) भाज्या शिजत आल्या कि चिंच कोळ आणि काळा मसाला घालावा तसेच लागल्यास थोडे पाणी घालावे.
४) भाज्या शिजल्या कि गूळ, तिळाचा कूट, खोबरं घालावे. लागल्यास चव पाहून मिठ घालावे. एक उकळी काढून भाकरीबरोबर गरमागरम भाजी सर्व्ह करावी.

टीप:
१) शेवग्याच्या शेंगा कोवळ्या घ्याव्यात नाहीतर त्या आतपर्यंत शिजत नाहीत. जर शेंगा जुन असतील तर त्या थोड्या वाफवून घ्याव्या.
२) भाजी शिजायला थोडा वेळ लागतो. जर झटपट भाजी हवी असेल तर चणे, पावटे, शेंगा, शेंगदाणे कूकरमध्ये २ शिट्ट्या करून वाफवून घ्यावे. परंतु भाज्या बाहेर शिजवल्यावर जो स्वाद येतो, तो कूकरमध्ये भाज्या शिजवल्यास येत नाही.

दलिया इडली - Daliya idli

Daliya Idli in English

वेळ: पूर्वतयारी- २० मिनीटे (दलिया भिजवणे वगळून) । पाकृसाठी- ३५ ते ४० मिनीटे
नग: १५ ते १७ मध्यम इडल्या

साहित्य:
१ कप दलिया रवा
२ कप गरम पाणी
फोडणीसाठी: १ टेस्पून तेल, २ चिमटी मोहोरी, २ चिमटी हिंग, २ हिरव्या मिरच्या
४ ते ५ कढीपत्ता पाने, बारीक चिरून
१/२ टिस्पून उडीद डाळ, १/२ टिस्पून चणाडाळ
१ टिस्पून किसलेले आले
१/२ कप आंबट दही
चवीपुरते मिठ
१ टिस्पून इनो सोडा
इडली स्टॅंड
इडल्या वाफवायला इडली कूकर किंवा साधा मोठा कूकर

कृती:
१) दलिया गरम पाण्यात ४ तास भिजत घालावा. दलिया भिजल्यानंतर त्यातील अधिकचे पाणी काढून ठेवावे, पुर्ण पाणी काढले नाही तरी चालेल (टीप १). पाणी काढलेला दलिया मिक्सरमध्ये मध्यम वाटून घ्यावा.
२) कढल्यात तेल गरम करावे. त्यात आधी डाळी घालून गुलाबी होईस्तोवर परताव्या. नंतर मोहोरी, हिंग, मिरची आणि कढीपत्ता घालून फोडणी करावी. हि फोडणी वाटलेल्या दलियामध्ये घालावी.
३) यामध्ये दही, किसलेले आले आणि मिठ घालून मिक्स करावे. मिश्रण तांदूळाच्या इडलीसाठी जे मिश्रण असते तितपतच दाट असावे. लागल्यास दलिया भिजवून जे पाणी ठेवले होते ते घालावे.
४) कूकरमध्ये तळाला अडीच ते ३ इंच पातळीपर्यंत पाणी घालावे. गॅस सुरू करावा. इडली पात्राला तेलाचा हात लावून घ्यावा.
५) मिश्रणाचे दोन भाग करावे (टीप ६). एका भागात १/२ टिस्पून सोडा घालावा. मिक्स करून इडली पात्रात भरावे.
६) कूकरमधील पाण्याला उकळी आली कि इडली स्टॅंड कूकरमध्ये ठेवावा. वरून झाकण लावावे. साधा कूकर वापरत असाल तर झाकणावरची शिट्टी काढून ठेवावी.
७) १२ ते १५ मिनीटे वाफवावे. गॅस बंद करून ७-८ मिनीटे वाफ जिरू द्यावी.
८) नंतर इडल्या चमच्याने काढाव्यात (टीप २). परत कूकरमध्ये पाणी गरम करून वरीलप्रमाणेच इडल्यांची दुसरी बॅच करावी.

टीप:
१) दलिया भिजवल्यावर जर जास्त पाणी उरले तर ते फेकून न देता सांबार बनवायला वापरावे. मी वापरले होते, चवीत फरक पडत नाही.
२) या इडल्या अख्ख्या गव्हाच्या असल्याने थोड्या चिकट राहतात व जास्त फुलत नाही. म्हणून पूर्ण वाफ मुरल्यावरच इडल्या चमच्याने काढाव्यात. थंड झाल्या तरी मायक्रोवेव्हमध्ये गरम करू शकतो.
३) या इडल्या जरा सालट लागतात. म्हणून शक्यतो या इडल्या फक्त चटणीबरोबर खाऊ नयेत. जोडीला सांबारही बनवावे.
४) डायबेटीस पेशंट्स किंवा ज्यांना तांदूळ न खायचे पथ्य आहे त्यांच्यासाठी न्याहारीचा उत्तम उपाय.
५) यामध्ये आवडीनुसार भाज्याही घालू शकतो.
६) माझ्याकडे असलेला इडली स्टॅंड लहान आहे आणि त्यात नऊच इडल्या होतात. तुमच्याकडे जर १२ किंवा १६ कप्प्यांचा स्टॅंड असेल तर एकाच वेळी तुम्ही सर्व इडल्या करू शकता.

गुळपोळी - gulpoli

Gulpoli in English

वेळ: साधारण २ तास
नग: जवळपास २५ मध्यम गुळपोळ्या

साहित्य:
सारणासाठी
१/२ किलो गूळ
१ कप बेसन
२ सुक्या नारळाच्या वाट्या
३/४ कप तिळ
१/२ कप शेंगदाणे
१/२ कप खसखस
१/२ कप तेल
आवरणासाठी
दिड कप मैदा
३/४ कप कणिक
२ टेस्पून तेल
चिमूटभर मिठ
२ टेस्पून बेसन (ऐच्छिक)

कृती:
१) सुक्या नारळाच्या वाट्या किसून घ्याव्यात. सोनेरी रंग येईस्तोवर कोरडेच भाजावे. हाताने चुरून घ्यावे. हा चुरा आपल्याला १/२ ते ३/४ कप हवा आहे. कमी असल्यास अजून थोडं खोबरं भाजून चुरा करावा.
२) तिळ व खसखस स्वतंत्र, कोरडेच भाजून घ्यावे. बारीक पूड करून घ्यावी
३) शेंगदाणे भाजून त्याची साले काढून टाकावीत आणि एकदम बारीक कूट करून घ्यावा.
४) एका मध्यम पण जाड बुडाच्या पातेल्यात १/२ कप तेल गरम करावे. त्यात १ कप बेसन खमंग भाजून घ्यावे.
५) गूळ बारीक किसणीवर किसून घ्यावा. सर्व भाजलेले जिन्नस (तिळ, खसखस, शेंगदाणे, बेसन, सुकं खोबरं) गूळामध्ये घालून मळून घ्यावे आणि घट्ट गोळा करावा.
६) मैदा, कणिक, मिठ आणि बेसन (ऐच्छिक) एकत्र करावे. २ टेस्पून तेल कडकडीत गरम करून पिठात घालावे. पाणी घालून मध्यमसर घट्ट गोळा भिजवावा. लागल्यास थोडे साधं तेल घालावे. १५ मिनीटे झाकून ठेवणे.
७) सारणाचे २३ ते २५ सारख्या आकाराचे गोळे करून घ्यावे.
८) आवरणासाठी आपल्याला "१ सारण गोळ्याला २ पिठाचे गोळे" हवे आहेत त्यानुसार सारणाच्या गोळ्यापेक्षा जरा लहान असा पिठाचा गोळा करावा.
९) २ पिठाच्या लाटयांमध्ये १ सारणाचा गोळा भरून लाटीच्या कडा सिल करून बंद करावा. हाताने हलके प्रेस करून थोड्या कोरड्या पिठावर पोळी लाटावी. गुळाची पोळी एका बाजूनेच लाटावी, बाजू पलटू नये.
१०) मिडीयम हाय हिटवर तवा तापवून दोन्ही बाजू खरपूस भाजून घ्याव्यात. कागदावर काढून किंचीत गार होवू द्याव्यात. एकदम गरम खावू नये, सारणातील गूळ गरम असल्याने चटका बसू शकतो.
गुळपोळी गार किंवा कोमट दोन्हीप्रकारे छान लागते. गुळपोळीवर नेहमी थोडे तूप घालून खावे म्हणजे उष्ण पडत नाही.

टीप्स:
१) पिठांचे प्रमाण आवडीनुसार बदलू शकतो. जर तुम्हाला खुडखुडीत पोळी हवी असेल तर मैदा जास्त आणि कणिककमी वापरावी तसेच गरम तेलाचे मोहनही घालावे. जर थोडी नरम पोळी हवी असेल तर फक्त गव्हाचे पिठ वापरावे आणि थंड तेलाचेच मोहन घालावे.

सिमला मिरची रस भाजी - Simla Mirchi batata Ras Bhaji

Simla Mirchi Rassa in English

वेळ: ३० मिनीटे
वाढणी: ३ जणांसाठी



साहित्य:
२ कप भोपळी मिरचीचे मोठे तुकडे
१ कप बटाट्याचे मध्यम तुकडे
फोडणीसाठी: १ टेस्पून तेल, २ चिमटी मोहोरी, २ चिमटी हिंग, १/४ टिस्पून हळद, १/२ टिस्पून लाल तिखट
१/२ टिस्पून गोडा मसाला
२ टेस्पून शेंगदाणा कूट
१ टेस्पून ताजा नारळ
१ टेस्पून चिंचेचा कोळ
१ टेस्पून गूळ किंवा चवीनुसार
चवीपुरते मिठ

कृती:
१) कढईत तेल गरम करावे. त्यात मोहोरी, हिंग, हळद, लाल तिखट घालून फोडणी करावी. आधी बटाटे घालून मिक्स करावे. साधारण एक ते दोन मिनीट वाफ काढावी.
२) आता भोपळी मिरची घालून मिक्स करावे. अंदाजे ३/४ कप पाणी, गोडा मसाला, चिंचेचा कोळ आणि मिठ घालून मिक्स करावे. बटाटे शिजेस्तोवर शिजवावे. गरज वाटल्यास थोडे पाणी घालावे. भोपळी मिरची एकदम मऊ होईस्तोवर शिजवू नये. अगदी किंचीत कच्ची राहू द्यावी.
३) बटाटा शिजला कि भाजीत गूळ, नारळ आणि शेंगदाणा कूट घालावा. छान ढवळावे आणि गरम गरम पोळीबरोबर सर्व्ह करावे.

लिंबाचे गोड लोणचे - Sweet Lime Pickle

Lemon Pickle in English

साहित्य:
१२ लिंबं (टीप १)
१ किलो साखर (४ मोठ्या वाट्या वरपर्यंत भरून)
१ वाटी मिठ
३/४ वाटी लाल तिखट
२ टिस्पून जिरेपूड

कृती:
१) लिंबं धुवून घ्यावीत. व्यवस्थित पुसून घ्यावी, पाणी राहू देवू नये. मध्यम आकाराच्या फोडी करून त्यातील बिया काढून टाकाव्यात. एका लिंबाच्या साधारण ८ ते १० फोडी कराव्यात.
२) फोडींना मिठ, तिखट, जिरेपूड लावून साधारण ८ दिवस स्वच्छ काचेच्या कोरड्या बरणीत भरून ठेवावे.
पद्धत १
साखरेचा १ तारी पाक करावा (१ किलो साखरेला दिड वाटी पाणी). पाक गार करावा. त्या पातेल्यात ८ दिवस मुरवलेल्या लिंबाच्या फोडी घालव्यात. ढवळून बरणीत भरावे.
सर्व लोणचे बरणीत भरले कि बरणीच्या तोंडाशी १ मुठभर साखर घालून झाकण बंद करावे. लोणचे चांगले मुरायला ४-५ महिने लागतात.

पद्धत २
जर पाक करायचा नसेल तर नुसती साखर, ८ दिवस मुरवलेल्या लिंबाच्या फोडीत मिक्स करावी. बरणीत भरून ठेवावे. रोजच्या रोज बरणी उघडून, स्वच्छ व कोरड्या चमच्याने लोणचे ढवळावे. असे साखर पूर्ण विरघळेस्तोवर करावे.

टीप:
१) लिंबं पातळ सालीची घ्यावी. जर अमेरीकेत असाल तर पातळ सालीची लिंबं मिळत नाहीत. अशावेळी पाणी एकदम चांगले उकळवावे. गॅस बंद करून त्यात आख्खी लिंबं घालावीत आणि वर झाकण ठेवावे. पाणी गार झाले कि लिंबं व्यवस्थित पुसून घ्यावी आणि एकदोन तास वार्‍यावर ठेवावी म्हणजे पाणी पूर्ण निघून जाईल. मग वरच्या कृतीनेच लोणचे करावे.

कच्च्या केळ्याचे कटलेट - Plantain Cutlets

Plantain Cutlets in English

वेळ: पूर्वतयारी- २० मिनीटे (साबुदाणा भिजवणे सोडून)। पाकृसाठी वेळ: २० मिनीटे
नग: साधारण १२ ते १४ मध्यम कटलेट


साहित्य:
२ कच्ची केळी
१ मध्यम बटाटा, उकडलेला
१/४ कप साबुदाणा
२ टेस्पून उपासाची भाजणी
३ टेस्पून शेंगदाण्याचा कूट
३ हिरव्या मिरच्या + १/२ टिस्पून जिरे + १/४ कप कोथिंबीर यांची पेस्ट
१ टेस्पून लिंबाचा रस
चवीपुरते मिठ
तूप किंवा शेंगदाणा तेल, तळण्यासाठी

कृती:
१) साबुदाणा धुवून त्यातील पाणी काढून टाकावे. झाकण ठेवून ४ तास झाकून ठेवावा.
२) साबुदाणा निट भिजला कि केळे सोलून किसून घ्यावे. नंतर साबुदाणा, किसलेले केळे, उकडून कुस्करलेला बटाटा, उपासाची भाजणी, शेंगदाणा कूट, मिरचीपेस्ट, लिंबू रस, आणि मिठ एकत्र करावे. निट मळून गोळा तयार करावा. हा गोळा समान विभागून मध्यम आकाराचे कटलेट बनवावे. आवडीप्रमाणे आकार द्यावा.
३) तेल किंवा तूप गरम करावे. तयार कटलेट मध्यम आचेवर तळून घ्यावे.
गोड लिंबाच्या लोणच्याबरोबर किंवा हिरव्या चटणीबरोबर सर्व्ह करावे.

तोंडली डाळ मेथ्या - Tondli Ras bhaji

Tondli Dal Methya in English

वेळ: पूर्वतयारी-१० मिनीटे। पाकृसाठी-१५ मिनीटे
वाढणी: २ ते ३ जणांसाठी

साहित्य:
१/२ पौंड तोंडली (जवळपास पाव किलो)
१/४ कप तूर डाळ
१/२ टिस्पून मेथी दाणे
३ ते ४ लसणीच्या मोठ्या पाकळ्या, बारीक चिरून
फोडणीसाठी: १ टिस्पून तेल, २ चिमटी मोहोरी, १/८ टिस्पून हळद, १/२ टिस्पून लाल तिखट
१/२ टिस्पून गोडा मसाला
१ टिस्पून गूळ
१/२ टिस्पून चिंचेचा घट्ट कोळ किंवा २ कोकमाचे तुकडे
चवीनुसार मिठ
सजावटीसाठी चिरलेली कोथिंबीर

कृती:
१) तोंडली उभी चिरून मिठाच्या पाण्यात घालावी.
२) तूरडाळ धुवून १० मिनीटे पाण्यात भिजवून ठेवावी.
३) लहान कूकरमध्ये तेल गरम करावे. त्यात लसूण आणि मेथी दाणे फोडणीस घालावे. लसूण थोडी ब्राऊन होवू द्यावी. नंतर मोहोरी, हळद आणि लाल तिखट घालून फोडणी करावी. तोंडल्यातील पाणी निथळून फोडणीस घालावी. एकदा परतून तूरडाळ घालावी व मिक्स करावे.
४) यामध्ये गूळ, गोडा मसाला, मिठ, आणि कोकम घालावे. थोडे पाणीसुद्धा घालावे (साधारण १/२ कप). मिक्स करून कूकरचे झाकण बंद करावे.
५) ३ शिट्ट्या करून गॅस बंद करावा. वाफ जिरू द्यावी. कूकर उघडून रश्श्याची चव पाहावी आणि तिखट-मिठ-मसाला लागेल तसे अडजस्ट करावे.
कोथिंबीरीने सजवून गरमच पोळीबरोबर सर्व्ह करावे.

टीप:
१) पदार्थ शिजायला काही कूकरला जास्त शिट्ट्या लागतात तर काहींना कमी. ३ शिट्ट्यांमध्ये तोंडली शिजतीलच. आपल्याला डाळ शिजलेली हवी पण ती आख्खी राहिली पाहिजे, तीचे वरण होता कामा नये. म्हणून आपापल्या कूकरप्रमाणे किती शिट्ट्या कराव्या ते ठरवावे.

अळीवाची खीर - Alivachi Kheer

Alivachi Kheer in English

अळीव पौष्टिक असल्याने बाळंतिणीच्या तब्बेतीसाठी उत्तम असतात. प्रसुतीनंतर कंबरदुखीवर अळीव गुणकारक आहे, तसेच पचनक्रिया सुधारते. बलवर्धक असल्याने अशक्तपणासाठी अळीव खाल्लेला चालतो.
अळीव उष्ण असल्याने गरोदरपणात शक्यतो खाऊ नये.

वेळ: १० मिनीटे (अळीव भिजवलेले असतील तर)
वाढणी: १ ते दिड कप

साहित्य:
१ कप दूध + अजून पाव कप दूध अळीव भिजवायला
१ ते दिड टेस्पून अळीव
३ ते ४ बदाम
१ खारीक (टीप २)
साखर चवीनुसार (साधारण दिड ते दोन टिस्पून)
चिमूटभर वेलचीपूड

कृती:
१) एका वाटीत अळीव पाव कप दुधात भिजत घालावेत (टीप ५). बदाम आणि खारीक दुसर्‍या वाटीत दुध किंवा पाण्यात भिजत घालावेत. (महत्त्वाची टिप १ पाहा). अळीव, खारीक आणि बदाम किमान ४ तास तरी भिजत ठेवावेत.
२) ४ ते ५ तासांनी अळीव चांगले फुलून येतील. तसेच खारीक बदामही चांगले भिजलेले असतील.
३) बदामाची साले काढून पातळ काप करावेत. खारकेची बी काढून खारकेचे बारीक तुकडे करावे.
४) दूध गरम करावे त्यात भिजवलेले अळीव घालावे. साखर, खारीक आणि बदाम घालून मध्यम आचेवर ३-४ मिनीटे शिजवावे. वेलचीपूड घालून ढवळावे आणि गरम गरम प्यावे.

टीप:
१) जर उन्हाळा असेल तर दुध फ्रिजबाहेर खराब होते. अशावेळी अळीव, खारीक आणि बदाम पाण्यात भिजवावेत.
२) जर खारकेचे तुकडे नको असतील तर खारकांची पूड करून ठेवावी. खीर करताना उकळत्या दुधात थोडावेळ शिजू द्यावी.
३) बदाम, खारीक भिजवलेले पाणी तसेच बदामाची साले पौष्टिक असतात. सोललेली बदामाची साले चावायला जरा चामट लागतात तरीही सालांमध्ये भरपूर फायबर आणि अँटिऑक्सिडंट असतात. तेव्हा पाणी आणि साले फेकून देऊ नयेत, खाऊन टाकावीत.
४) आवडीनुसार पिस्ता, काजू, बेदाणेसुद्धा खिरीत घालू शकतो.
५) अळीव भिजवताना चमच्याने निट ढवळावे. अळीव हलके असतात त्यामुळे ते पाण्यावर/ दुधावर तरंगतात आणि कधीकधी निट भिजत नाहीत.

Labels:
Lactation Boosting Recipes, Aliv kheer, Balantinicha ahar, post pregnancy recipes

मायक्रोवेव्ह उपमा - Microwave Upma

Microwave Upma in English

वेळ: साधारण २० मिनीटे
वाढणी: ३ जणांसाठी

साहित्य:
३/४ कप रवा
१ ते २ टेस्पून तूप
फोडणीसाठी - १ टेस्पून तूप, चिमूटभर मोहोरी, १/४ टिस्पून जिरे, १/२ टिस्पून उडीद डाळ, चिमूटभर हिंग, ३ हिरव्या मिरच्या, ४-५ कढीपत्ता पाने, १/४ टिस्पून आले
१/२ कप कांदा, बारीक चिरलेला
१/४ कप मटार (ऐच्छिक)
१/२ कप टोमॅटो, बारीक चिरलेला (ऐच्छिक)
मिठ, साखर चवीनुसार
१ टेस्पून तूप (ऐच्छिक)
सजावटीसाठी कोथिंबीर, लिंबू, ताजा खोवलेला नारळ
मायक्रोवेव्ह सेफ ग्लास बाऊल विथ ग्लास लिड

कृती:
रवा भाजणे
१) ३/४ कप रवा मायक्रोवेव्ह सेफ झाकणात समान पसरवून हाय पॉवरवर दिड मिनीट मायक्रोवेव्ह करा. डीश बाहेर काढून चमच्याने रवा ढवळावा. परत दिड मिनीट मायक्रोवेव्ह करावा. डीश बाहेर काढून ढवळावा. नंतर अजून २ मिनीटे मायक्रोवेव्ह करावा. (दिड मिनीट + दिड मिनीट + १ मिनीट + १ मिनीट) (महत्त्वाची टिप १)
फोडणी:
२) आता मायक्रोवेव्ह सेफ काचेच्या वाडग्यात १ टेस्पून तूप घ्या. हाय हाय पॉवरवर दिड मिनीट मायक्रोवेव्ह करा. त्यात मोहोरी, जिरे आणि उडीदडाळ घालून दिड मिनीट ते दोन मायक्रोवेव्ह करा. वाटल्यास मध्येच भांडे बाहेर काढून ढवळा.
३) आता हिंग, चिरलेल्या मिरच्या, कढीपत्ता, ठेचलेले आले घालून ३० ते ४० सेकंद मायक्रोवेव्ह करा.
४) बारीक चिरलेला कांदा घालून मिक्स करा. साधारण दिड मिनीट असे ३ वेळा मायक्रोवेव्ह करा.
५) आता चिरलेला टोमॅटो, मटार घालून मिक्स करा. दिड मिनीट असे दोनदा मायक्रोवेव्ह करा. मधे भांडे बाहेर काढून ढवळा.
६) सव्वा कप पाणी घाला. चवीपुरते मिठ आणि साखर घालून पाण्याची चव पाहून लागल्यास मिठ किंवा साखर अड्जस्ट करा. १ मिनीट मायक्रोवेव्ह करा.
७) भाजलेला रवा घालून मिक्स करा. झाकण ठेवून २ मिनीटे मायक्रोवेव्ह करा. भांडे बाहेर काढून थोडे तूप घाला आणि मिक्स करा. परत २ मिनीटे मायक्रोवेव्ह करा. आणि थोडावेळ वाफ मुरावी म्हणून तसाच आत ठेवा. ३ ते ४ मिनीटांनी तयार उपमा बाहेर काढून कोथिंबीर, लिंबू, ओला नारळ यांनी सजवून सर्व्ह करा.

टीप:
१) प्रत्येक मायक्रोवेव्हची पॉवर वेगवेगळी असते त्यामुळे वर दिलेल्या कालावधी एखाद मिनीट कमी किंवा जास्त होवू शकते याची नोंद घ्यावी.
२) तूपाऐवजी तेलही वापरू शकतो. तूपामुळे खुप छान चव येते.
३) आवडीनुसार काजूही घालू शकतो.
४) वेळ व्यवस्थित वापरल्यास २०-२२ मिनीटांत उपमा बनतो. म्हणजे रवा भाजताना कांदा, टोमॅटो चिरून घ्यावा तसेच बाकीची तयारी घ्यावी.
५) १ ते ६ स्टेप्स काचेचे भांडे न झाकता फॉलो करा, आणि फक्त ७ व्या स्टेपमध्ये भांड्यावर झाकण ठेवावे.

उपम्याच्या इतर रेसिपीज
रवा उपमा - शेगडी वापरून
शेवई उपमा

Labels:
Upma, rava upma, Microwave upma

मायक्रोवेव्ह सुरळी वडी - Microwave Surali Vadi

Surali Vadi in English

साधारण १२ ते १५ वड्या
वेळ: पूर्वतयारी:- १५ ते २० मिनीटे । मायक्रोवेव्ह:- ५ ते ७ मिनीटे

साहित्य:
१ कप बेसन
१ कप आंबट ताक (जरा घट्ट)
दिड ते पावणेदोन कप पाणी
पाउण ते एक टिस्पून मिरचीचा ठेचा
१/२ टिस्पून हळद
१/२ टिस्पून हिंग
फोडणीसाठी : २ टेस्पून तेल, १/४ टिस्पून मोहोरी, २ ते ३ चिमटी हिंग
खवलेला ताजा नारळ, गरजेनुसार
वरून पेरायला थोडे लाल तिखट
बारीक चिरलेली कोथिंबीर
मीठ
मिश्रण पसरवण्यासाठी कालथा
जाड प्लास्टिकचा लांब कागद

कृती:
१) बेसन, ताक, पाणी एकत्र करावे. बेसनाच्या गुठळ्या न होता मिश्रण भिजवावे. त्यात मिरचीचा ठेचा, हळद आणि हिंग घालावे. चवीपुरते मीठ घालावे. सर्व मिश्रण एकदम स्मूद करून घ्यावे.
२) बेसनाचे हे मिश्रण शिजवण्यापुर्वी प्लास्टिकचा कागद ओट्यावर किंवा टेबलावर पसरवून ठेवावा.
३) मायक्रोवेवसेफ भांड्यात सर्व मिश्रण घालावे. हाय पॉवरवर ५० सेकंद मिश्रण शिजवावे. भांडे बाहेर काढून व्यवस्थित ढवळावे. किंचीत गुठळ्या होण्याची शक्यता असते तेव्हा एगबिटरने मिश्रण निट एकजीव करून घ्यावे. मिश्रण शिजेस्तोवर ३०-४० सेकंद मायक्रोवेव करत राहावे. साधारण २ ते ३ वेळा मिश्रण मायक्रोवेव करावे लागते. मिश्रण खुप दाट नाही आणि खुप पातळ नाही असे झाले कि मिश्रण शिजले असे समजावे.
४) मिश्रण थंड होवू देवू नये. लगेच कालथ्याने मिश्रणाचा पातळ थर प्लास्टिक कागदावर पसरावा. थोडे थंड होवू द्यावे.
५) कढल्यात तेल गरम करावे त्यात मोहोरी, हिंग घालून फोडणी करावी. आणि मिश्रणाच्या पातळ थरावर चमच्याने फोडणी पसरावी. म्हणजे फोडणी नीट पसरली जाते.
६) त्यावर खवलेला नारळ आणि बारीक चिरलेली कोथिंबीर पेरावी. थोडे लाल तिखट पेरावे. नंतर सुरीने ५ इंच पट्ट्या कापाव्यात. त्याची सुरळी (गुंडाळी)करावी आणि मग त्या सुरळीचे ३-४ भाग करावेत.
७) सर्व्ह करताना सुरळीच्या वड्यांवर थोडी कोथिंबीर आणि खवलेला नारळ घालावा.

सुरळीच्या वड्या - शेगडी (गॅस) वापरून

टीप:
१) मिश्रणाचा पातळ थर करण्यासाठी स्टीलची ताटेसुद्धा वापरू शकतो पण त्यामुळे खुप ताटे वापरली जातात.
२) जर फोडणी फक्त वड्यांवर आवडत असेल तर आपल्या आवडीनुसार सुरळ्या केल्यानंतर त्यावर फोडणी घालावी.
३) सुरळीच्या वड्या करताना नारळ आणि कोथिंबीर आपण आधीच पेरले आहे त्यामुळे चव छान येते. पण सुरळी करताना थोडा त्रास होवू शकतो. अशावेळी मिश्रणाचा पातळ थर केल्यावर त्यावर फक्त फोडणीच घालावी. सुरळी करून मग वरून कोथिंबीर आणि नारळ पेरावे.

Labels:
Surali Vadi, Khandvi, Gujrati Snack